REPÚBLICA DEMOCRÁTICA DE TIMOR-LESTE

LEI DO PARLAMENTO

6/2009

(Alterasaun dahuluk, nu'udar apresiasaun parlamentár, ba Kódigu Penál aprovadu ho Dekretu-Lei n. 19/2009, iha 8 Abríl)



Vida tenke hetan protesaun hahú kedas hosi ser umanu nia konsesaun. Simu tiha prinsípiu ida ne'e, ita labele haluha katak iha mós situasaun ne'ebé bele justifika interrupsaun ba gavidéz. Maibé, tanba bem sira-ne'ebé tama iha konflitu iha ne'e todan tebes, bem feto isin-rua nia vida ho bem fetu ka embriaun nia vida, rua ne'e ho valór hanesan de'it, iha situasaun extrema maka ita bele konsidera interrupsaun ne'e lejítima: kuandu ho sakrifísiu ba vida ida maka bele salva vida ida seluk no labele kaer nafatin vida rua ne'e hotu dala-ida.

Nune'e, tenke estabelese katak interrupsaun ba gravidéz bele iha de'it kuandu ho interrupsaun ne'e maka feto isin-rua la mate, no feto ne'e maka sei deside, tuir nia konxiénsia, konaba interrupsaun ne'e.



Nune'e, tuir Konstituisaun nia artigu 92, n. 1, no 98, Parlamentu Nasionál dekreta, atu vale hanesan lei, buat-ne'ebé tuirmai ne'e:



Artigu 1

Alterasaun ba Kódigu Penál



Artigu 141 iha Kódigu Penál aprovadu ho Dekretu-Lei 19/2009, iha 8 Abríl, no aneksu iha diploma ne'e, altera tiha hanesan tuirmai ne'e:



“Artigu 141

(…)



1. (…)



2. (…)



3. (…)



4. Númeru anteriór nia dispozisaun la aplika kuandu, tuir koñesimentu no experiénsia médika ne'ebé iha ona no halo tiha buat hotu ne'ebé bele halo atu salva feto isin-rua no fetu ka embriaun nia vida, interrupsaun ba gavidéz maka bele hadook mate hosi feto isin-rua, naran katak iha sertifikasaun médika no médiku maka halo ka profisionál seluk iha saúde maka halo, ho médiku nia diresaun, iha estabelesimentu ba saude públiku ka ofisialmente rekoñesidu, no ho feto isin-rua nia konsentimentu.



5. Molok halo interrupsaun painél ida ho médiku na'in tolu tenke sertifika sirkunstánsia sira referida iha númeru anteriór, iha atestadu médiku eskritu no asinadu; iha painél ne'e halo parte médiku ida-ne'ebé realiza ka superviziona interrupsaun ba gravidéz nia realizasaun.



6. Konsentimentu feto isin-rua maka sei foo rasik iha doku-mentu eskritu no asinadu, rona tiha, kuandu bele, nia kónjuje ka ema ne'ebé moris ho nia hanesan lain ho feen, ka ema seluk, tuir feto ne'e nia pedidu, maka foo, no, kuandu bele, sei foo tiha loron rua uluk molok atu halo interrupsaun ne'e.



7. Kuandu feto isin-rua ema menór ida, nia reprezentante legál maka sei foo konsentimentu.



8. Kuandu feto isin-rua maiór ka emansipada ema inkapáz psikikamente ida ka ema-ne'ebé sofre hela inkapasidade psíkika, nia kónjuje ka ema ne'ebé moris ho nia hanesan lain ho feen, ka nia reprezentante legál, axendente ka dexendente, ka, laiha karik, nia parente kolaterál ruma, respetiva no susesivamente, maka foo konsentimentu ne'e.



9. Kuandu labele hetan atestadu médiku referidu iha n. 5 no/ka labele hetan konsentimentu nu'udar hakerek hela iha n. 6 too 8, no interrupsaun tenke halo lalais no labele hein tan ona, médiku, haree ba situasaun ida-idak, maka sei deside, uza mós, kuandu bele, médiku seluk sira nia paresér.



10. Iha painél referidu iha n. 5 sei tama médiku ne'ebé iha koñesimentu adekuadu atu avalia sirkunstánsia ne'ebé justifika interrupsaun ba gravidéz, no, kuandu bele, médiku jinekolojista/obstetra ida.



11. Médiku sira-ne'ebé emite atestadu médiku no médiku sira-ne'ebé realiza ka superviziona interrupsaun ba gravidéz nia realizasaun tenke foo esklaresimentu nesesáriu ba feto isin-rua no, kuandu tama iha situasaun ne'e, ba ema sira-ne'ebé n. 7 no 8 refere, nomeadamente konaba métodu atu uza iha interrupsaun, interrupsaun ne'e nia efeitu rasik no nia konsekuénsia ba feto isin-rua nia saude fízika no psíkika.



12. Médiku no profisionál ba saude seluk sira iha direitu atu aprezenta objesaun tuir sira-nia konxiénsia hasoru aktu ruma konaba interrupsaun ba gravidéz.



13. Médiku no profisionál ba saude seluk sira-ne'ebé invoka objesaun tuir sira-nia konxiénsia tenke garante profisionál iha saúde seluk nia intervensaun imediata iha aktu sira-ne'ebé tenke halo no mós akompañamentu imediatu ba feto isin-rua.



14. Objesaun tuir konxiénsia tenke hatudu expresamente no tenke foo-hatene ba responsavel klíniku iha estabelesimentu ba saude iha ne'ebé objetór servisu”.



Artigu 2

Moris



Diploma ida-ne'e moris iha loron ida-ne'ebé tuir fali nia publikasaun.



Aprovadu iha 26 Maiu 2009





Parlamentu Nasionál nia Prezidente





Fernando La Sama de Araújo





Promulgadu iha 3 Jullu 2009



Publika ba





Prezidente da Repúblika





José Ramos Horta