Vise Ministru Justisa, Ivo Jorge Valente halo vizita ba edifisiu Direcção Nacionál Terras Propriedades Servico Cadastrais (DNTPSC), Direcção Nacional Registo Notariado (DNRN) no Autoridades Tribunais distritais Covalima. Alende hal’o programa divulgasaun leis, justisa no direitus Humanos iha distritus, Vise Ministru Justisa, mós hala’o vizita ba edifisiu eskritoriu DNTPSC, DNRN distritu Manufahi, Covalima no Bobonaro. Iha vizita ne’e vise Ministru hakarak hare no rona rasik difikuldade saida dei’it mak funsiunarius distritu sira infrenta no nesesidade saida mak funsiunarius sira presiza hodi atende komunidades sira iha distritu ida-idak. Atu nune’e iha tinan fiskal 2011 oin mai Ministériu Justisa tau perioridade ba nesesidade refere.

Iha distritu Manufahi, Vise Ministru rasik ba hasoru malu ho menejer EDTL hodi koalia kona-ba bain hira mak bele monta fiu eletrisidade nian ba edifisiu foun Direcção Nacional Registo Notariado distritu Manufahi ne’ebé durante ne’e remata ona maibe seidauk utilija tamba ahi eletrisidade seidauk liga.

Vizita tiha ba edifisiu DNTPSC no DNRN distrital Vise Ministru halo mos vizita ba iha Autoridades Tribunais distrital iha Covalima hodi hasoru malu ho Juiz no Procuradora distrital Covalima hodi entrega livrus Kódigu Penál no Kódigu Prosesu Penál ba Procuradora distritu Covalima, Señora Zelia Trindade, hodi hala’o sira nia kna’ar nu údar procuradora.

Iha fatin hanesan Vise Ministru hateten,” entre edifisiu sira ne’e maiszumenus edifisiu DNTPSC no DNRN distritu Bobonaro nian iha Maliana hau bele dehan diak, maibe distritu sira seluk seidauk diak, neduni ho orsamentu 2011 nian Ministériu justisa sei hare atu bele rehabilita edifisiu sira ne’e hodi sira bele iha preparasaun diak liu tan hodi bele implementa lei kona-ba Terras Propriedades iha tinan oin mai.

Nune’e mós ami sei hare atu apoio ekipamentu ba diresaun distritais sira presiza liu-liu apoio transporte ba iha fronteiras hodi bele implementa Billette Identidade (BI) no passa Fronteira, tamba ne’e ho identifikasaun ba problemas lubuk ida ne’ebé ministériu justisa sei foti desizaun iha 2011 ba servisus ne’ebé maka bele azlera no trasa ona iha plano seitor justisa nian 2011.”

João Mp. da Costa
Revista Ministeriu