SETP SEFOPE Hala’o Dialogo ho Komunidade Aituto

Sekretáriu Estadu Terras Propriedades (SETP) Mario Ximenes hamutuk ho Sekretáriu Estadu Formasaun Propfesional no Emprego (SEFOPE) Alarico do Rosario - iha loron 12 fulna-Fevereiro 2021 foin lalais ne’e hala’o dialogo ho Autoridade lokál no komunidade Aituto hodi ko’alia kona-ba planu harí Guest Hous ho Cafetária iha Fleixa, Aituto Postu Maubisse.
Iha dialogo ho komunidade ne’e Sekretáriu Estadu Terras no Propriedades, Mario Ximenes husu ba komunidade sira nia apoiu no kolaborasaun hodi bele harí Guest House ho Cafetária iha Fleixa.

Tuir Membru Governu ne’e, bainhira Governu liuhosi SEFOPE iha planu hodi hala’o atividade refere iha Fleixa, komunidade sira iha Aituto ne’e mak sei hetan ninia benefísiu.
Nia hateten bainhira Estadu liuhosi SEFOPE atu harí sentru formasaun iha Fleixa, ne’e ninia vantajen boot ba Maubisse oan sira, liu tanba fleixa hanesan fatin úniku ne’ebé ho nia klima la hanesan ho fatin sira seluk, e ne’e bele dada tuirsta nasionál no internasional barak mak sei halo viajen iha fleixa e bele mós sai fatin reflesaun ba tuirsta sira.

Hatan ba preokupasun komunidade sira nian kona-ba problema rai, membru governu ne’e hateten, ida ne’ebé sai obstaklu ba dezenvolvimentu mak problema rai, ho nune’e atu hateten katak, Terras Propriedades la’ós nain ba rai, maibé nia atu halo jestaun no jere hodi rekoñese rai nia nain mak sé, hodi garante sidadaun sira nia diretu nain ba rai.
“Ha’u husu ba komunidade Aituto labele sai hanesan obstaklu hodi impede prosesu dezenvolvimentu, nune’e mós labele sai hanesan obstaklu hodi hapara atividade ba harí Guest House ho Cafetaria iha dalan klaran, dehan Mário.

Iha fatin hanesan Sekretáriu Estadu Formasaun Professionál no Emprego Alarico do Rosario, husu ba joven joven aituto tenki preparadu hodi simu dezenvolvimentu no labele sai fali hanesan obstaklu ba prosesu dezenvolvimentu.
Iha biban ne’e Alarico hateten, iha tempu badak SEFOPE liuhosi tékniku sira iha Sentru formasaun tibar sei ba halo rekrutamentu ba joven Aituto hodi tuir formasaun iha Tibar antes atu harí cafeteria no Guest House iha fleixa, tanba tuir Membru Governu ne’e, antes atu halo atividade ruma, joven sira tinki preparadu antes.

Hanesan tékniku Diretór Jerál Terras Propriedades, Rodrigo de Mendonça mós husu ba komunidade sira atu bele iha koperasaun ne’ebé diak ho estadu nune’e iha tempu badak bele harí Guest House ho Cafetaria iha Fleixa.
Hatan ba preokupasaun governu nian kona-bá atu harí guest house ho kafetaria iha Fleixa, Administrador Postu Maubisse, Luis Caramiro Lopes hato’o agradesimentu, ba membru governu sira no nia hateten Maubisse nakloke hodi simu dezenvolvimentu.
Hafoin diálogu ho komunidade sira, membru Governu nain rua hetan akompañamentu hosi Administradór Postu Maubisse no Xefe Suku Aituto inklui mós komunidade sira hodi ba haree fatin ne’ebé atu harí Guest House ho kafetaria.*

Ananias Babo Horta
Relasaun Públika SETP