Pontu Fokál Pré-Deskonsentrasaun Administrativa, Ministériu Justisa entrega Estrutura Munisipiu ba Diretór Diresaun Terras Propiriedade Servisu Cadatrais (DTPSC) no Diretóra Diresaun Rejistu Notariadu (DRN) Munisipiu Ermera iha loron 8 fulan Outubru 2014.

Molok ekipa Pontu Fokál Pré-Deskonsentrasaun Administrativa (PDA) Ministériu Justisa dezloka ba munisipiu Aileu, Ermera no Liquisa hodi entrega estrutura munisipiu nian ba diresaun rua, Pontu Fokál PDA Ministériu Justisa hetan despaissu husi S.E. Ministru Justisa, Dionísio Babo Soares hodi halao knar ida ne’e.

Koordenadór Pontu Fokál PDA, Antonio Verdial de Sousa esplika ba funsiunariu diresaun rua ne’ebe halibur hamutuk iha edifisiu DTPSC Ermera hodi koalia kona-ba servisu munisipiu nian no problema saida mak sira infrenta. Iha soru mutu ne’e ekipa PDA rona preokupasaun ne’ebé sai hanesan dezafiu funsiunariu munisipiu Ermera sira nia mak hanesan rekursu umanus, finansiamentu, ekipamentu servisu hanesan komputador, meza no kadeira.

Iha soru mutu ne’e Diretór DTPSC Munisipiu Ermera, Afonso Salsinha hateten,” ami iha diresaun ne’e iha de’it funsiunariu nain nen (6), no ami iha transporte ida mais kondisaun ladiak ona hodi halo viajen ba administrasaun postu sira, motor ba funsiunariu sira mós laiha no at liu tan kadeira plastik sira atu halo enkontru ruma atu tur mós laiha.”

Iha fatin hanesan Diretora Diresaun Rejistu Notariadu (DRN) Munisipiu Ermera, Maria Santina Tilman Alves iha enkontru ne’e hateten,”ami nia situasaun iha munisipiu Ermera ne’e hanesan Diretór DTPSC hateten ona ne’e, no ami husi Diresaun Rejistu Notariadu nian kona-ba mobiliariu hanesan kadeira no meza, tanba realidade ami nia Notaria mai servisu iha ne’e kleur ona maibe ninia kadeira no meza kondisaun rai komputador mós ladiak ona.”

Iha enkontru entre funsiunariu diresaun rua ho Pontu Fokál PDA Ministériu Justisa ne’e iha funsiunariu DTPSC kestiona kona-ba funsiunariu ARD ne’ebe transfere ba DTPSC to’o agora dadaun sira sai hanesan funsiunariu kazual, laos permanente. Nune’e mós funsiunariu kazual ne’e kestiona kona-ba ekipamentu hirak mak uluk ARD transfere ona ba DTPSC no to’o agora, kompaña ne’ ebe manan, Sistema Cadastru Nasional (SCN) maki uza fali hodi halo servisu kompaña nian.

Tuir observasaun ekipa PDA hatudu katak kona-ba edifisiu ba diresaun rua ne’e agora dadaun sufisiente atu implemeta programa munisipiu maske transporte ba funsiunariu sira mak laiha maibe sira kontetente nafatin hodi halo servisu.

João Maupelo da Costa
Pontu Fokál PDA Ministériu Justisa