AILEU-Sekretáriu Estadu Terras Propriedades (SETP) Jaime Xavier Lopes hamutuk ho Vise-Ministru Justisa, Ivo Jorge Valente, iha loron 3 fulan-Outubru 2014 foin lalais ne’e hala’o inagurasaun ba Edifisiu foun Diresaun Terras Propriedades Servisu Cadastrais Distritu Aileu.

Iha inagurasaun ne’ebé hauu ho asina plaka hosi SETP no ko’a pita hosi Vise MJ ne’e tuir SETP, fatin foun servisu mós tenki iha mudansa, labele lori esperitu ne’ebé uluk nian mai tama fali iha edifisiu foun.

Jaime mós husu ba diretór distritu Aileu ho nia funsionáriu sira hodi bele resvisu ho responsablidade, nune’e mós tenki fó atendementu ne’ebé di’ak ba iha komunidade sira.

Nune’e membru governu ne’e mós husu ba dirijente distiritu nian inklui funsionáriu sira hodi bele fó solusaun ne’ebé maka di’ak ba komunidade sira bainhira mosu problema entre sira.

Haree ba kondisaun edifisiu ne’ebé maka ladun di’ak, SETP husu atu bele pasensia nune’e iha futuru mai bele hadi’a.

Iha inagurasaun ne’e Vise Ministru Justisa, Ivo Jorge Valente hateten, nia parte sinte kontenti tanba bele harii edifisiu foun ida iha disttritu Aileu.

Aileu tuir Vise Ministru hanesan distritu istóriku ida, tanba ne’e iha loron 28 fulan-Novembru 2014 fulan oin sei halo komemorasaun iha ne’e.

Tuir Ivo distritu sira seluk sei falta buat balu, hanesan iha distritu balu kompaña sira halo buat balu ne’ebé la iha adisionál maibé iha distritu balu maske iha item balu ne’ebé maka la tau iha planu maibé sira halo mós ho lutu no uma ba seguransa nian, ne’e hanesan kontribuisaun sira nian ba iha estadu.

Tanba ne’e Vise MJ ne’e husu ba dirijente distritu inklui mós funsionáriu sira tenki uza edifisiu ne’e ho di’ak no tenki iha responsablidade másimu ba iha atendementu públiku.

Oras ne’e dadaun tuir Reprezentante Ministru Justisa, problema ne’ebé Terras Propriedade infrenta maka kapasidade intrepretasaun kona-ba lei rai nian, ho ida ne’e maka sai hanesan kestaun ida ne’ebé maka Terras Propriedade tenki hasoru.

Tanba iha inagurasaun ne’e la hetan partisipasaun hosi MJ, Vise Ministru Justisa Lori MJ nia naran hakarak hato’o agradesementu ba instuisaun hotu ne’ebé maka durante ne’e kopera di’ak ho Terras Propreidade hodi bele hala’o konstrusaun to’o remata.

Hanesan uma-na’in Diretór hosi Diresaun Terras Propriedades Servisu Cadastrais Distritu Aileu, Gaspar Soares Benevides hateten, nia parte sinte orgullu tanba bele hetan edifisiu foun, nune’e bele hala’o knár ho di’ak tuir mandatu ne’ebé maka iha,

Kona-ba konstrusaun edifisiu Gaspar hateten, edifisiu ne’e hahuu halo konstrusaun iha loron 11 fulan-Jullu 2011, prosesu kontrusaun foin remata tanba, materiál ba konstrusaun nian mai hosi rai-liur.

Iha inagurasaun ne’e hetan partisipasaun hosi Sekret’ariu Estadu terras Propriedades, Vise Ministru Justisa, Xefe Gabinete hosi SETP ho Vise MJ nian, Komisaria Direitu ba Labarik, Inspetúr Jerál Ministériu Justisa, Diretór Nasionál Teras Propriedades no Servisu Kadastrais, Diretór Nasionál Administrasaun Finansas MJ, Diretór Terras Propreidade Distritu Manatuto, Inklui Xefe Departamentu sira hosi DNTPSC, Administradór Distritu Aileu no Dirijenti tomak distritu Aileu nian.*
Ananias Babo Horta
Media Officer SETP