Lisboa-Kestaun seguransa ba ita nia passaporte sai ona hanesan asuntu ida ne’ebé ema hotu nia prekupasaun. Tamba ida ne’e aproveita visita trabalhu iha Portugal ne’e, Dr. Dionísio Babo, Ministru Justisa Timor Leste halo mos visita ida ba Casa Moeda iha Lisboa, 7 Fevereiru 2014 ne’e. Visita ne’ebé simu direitamente husi Presidente Casa Moeda ho nia estrutura tomak.
Durante diskusaun nia laran, Ministru Dr. Dioísio informa hela konaba protokolu kooperasaun ne’ebé foin asina entre MJ Timor Leste no MJ Portugal. Protokolu ne’e hanesan protokolu sumbrinha entaun iha posbiliade mos atu kave ba kooperasaun ho Casa Moeda iha parte passaporte ninian. Hatan ba hanoin ida ne’e, Presidente Casa Moeda ne’e informa katak, ne’e hanesan dalan ida diak tebes atu hasa’e tan kooperasaun ne’ebé iha ona durante ne’e. Hanesan ita hotu hetene katak, ita nia moeda nasional (osang sentimos) durante ne’e mos produs iha Casa Moeda ne’e.
Aleinde halo sorumutu ho estrutura Casa Moeda ne’e, Ministru Dr. Dionísio ho nia delegasaun tomak, hetan konvite espesial atu asisti direitamente oin nusa prosesu ba imisaun passaporte Portuguesa ninian, hahú husi rekolha dadus pesoal (base de dados), suratahan algudaun atu sai hanesan folha passaporte nian, seguransa ba folha no kappa husi passaporte ne’e, imisaun nomoru kaderneta, verifikasaun dadus pessoal, verifikasaun ba seguransa kaderneta no ikus liu maka packing hodi haruka sai.

Prosesu ba imisaun passaporte iha Casa Moeda ne’e, asegura seguransa mais alta. Ida ne’e hatudu husi limitasaun asesu ba fatin sira ne’e, kontroladu ho kartaun automatiku nomos seguransa ba dadus pessoal. Ida ne’e atu hatudu katak, Casa Moeda iha obrigasaun atu garante ema ida nia dadus pessoal atu la bele monu ba ema seluk.
Atu informa mos katak, nasaun Cabo Verde mos halo nia passaporte iha Casa Moeda ne’e, tamba modelu passaporte Portugal nian, ne’ebé produs husi Casa Moeda ne’e, hetan kualifikasaun diak iha parte seguransa husi mundo internasional.
Ministru Dr. Dionísio ne’ebé akompanha husi Sr. Nelinho Vital, Direitor DNAJL-MJ, Insp. Luis Barreto, adjunto Direitor Polisia Imigrasaun, Assessor sira husi MJ nomos Sec. Estado Segurança nian, termina visita trabalhu ne’e ho troka prendas, hanesan lasu amizade entre instituisaun rua.

Atu kontinua hetan informasaun apropiadu konaba passaporte nian ne’e, Ministru Dr. Dionísio homos Secretario de Estado da Defesa, Dr. Julio Tomas Pinto ba visita mos Servisu Estrangeiros e Fronteira (SEF), hodi rona konaba oin nusa kontrola passaporte sai nomos kontrola ba movimentu ema nian hodi tama mai rai laran. Iha okaziaun ne’e mos selebra tan asina akordu koopersaun entre SEF-Portugal ho Imigrasaun Timor Leste.(N/)