Dili - Durante loron 3 nia laran, hahú husi loron 25-27 Novembro 2013, DNAJL (Direcção Nacional da Assessoria Jurídica e Legislação) Ministério da Justiça ne’ebé servisu hamutuk UNWOMAN, organiza formasaun espesialidade ida ba jurista Timor-oan sira ne’ebé hala’o k’nar iha instituisaun Estado nian, hanesan jurista husi DNAJL-MJ, Ministério das Finanças, Ministério da Saúde, Ministério da Agricultura e Pescas, nomos organizasaun la’os Governo nian (NGO) sira, inklui jurista Timor-oan husi Provedoria-PDHJ.

Tuir Diretor DNAJL, Sr.Nelinho Vital katak : “formasaun ne’ebé foin hala’o ba dahuluk ne’e, hanesan parte ida husi programa kapasitasaun rekursu humanus nian. Formasaun ida ne’e importante tebes ba jurista sira, tamba konvensaun CEDAW-Konvensaun ida ne’ebé Timor-Leste mos hanesan Estado Parte- sai hanesan rekursu ou fontes importante ida hodi hatan konaba feto nia direitu ou igualdade jeneru. Ho nune’e, sai mos hanesan obrigasaun ba Ita, atu uza CEDAW hanesan fonte legal, wainhira halo preparasaun ba hakerek diploma ida nomos analiza ba diploma legal ida”.

Atu atinji prinsipiu konaba direitu hanesan entre mane no feto, tuir Konstituisaun haruka, dalan ida maka garanti prinsipiu hirak ne’e liu husi diploma legal. Ho ida ne’e, importante tebes ba jurista sira atu haklean sira nia matenek iha parte direitu humanos, espesifiku liu konaba direitu feto.

Iha parte seluk, partisipante husi formasaun ne’e, Dr. José Caetano informa katak “husi ami nia parte kontente tebes hodi partisipa iha formasaun ida ne’e, tamba bele aumenta ami nia konhesimentu konaba CEDAW ne’e rasik nomos ami bele hatene liu tan konaba oin nusa atu uza CEDAW hodi halo analiza legal”.

Formasaun durante loron 3 ne’e fasilita husi peritu ba CEDAW husi nasaun Philipina, Sra. Ellaine Ellinior no formasaun ne’e bele hala’o ho diak tamba iha servisu hamutuk maximu husi DNAJL ho UNWOMAN. Tuir planu, formasaun hanesan sei hala’o tan iha tinan oin mai, tantu iha rai laran nomos sei hala’o iha rai liur/rejiaun nian laran.

@Florindo