Dili - DNAJL (Direcção Nacional da Assessoria Jurídica e Legislação) Ministério da Justiça hahú iha loron Qinta-feira no Sexta-feira,21-22 Novembru 2013 servisu hamutuk ho ajensia UNWOMAN, organiza formasaun komplementar ba funsionariu DNAJL nian ne’ebé haknár a’an hanesan jurista/legal drafter husi Departamento Politica Legislativa nomos ba tardutor sira husi Departamento de Tradução. Formasaun komplementar ne’e konaba Aplikasaun Direitu Humanos no CEDAW iha Diploma Lejislasaun. Formasaun ne’e hanesan programa konkretu ida husi kooperasaun entre Ministério da Justiça no UNWOMAN nomos hanesan programa ba dahuluk entre DNAJL ho UNWOMAN rasik.

Tuir Diretor DNAJL, Nelinho Vital katak : “formasaun ida ne’e importante tebes tamba ho objetivu atu hasa’e jurista nomos tradutor sira nia konhesimentu iha parte direitu humanos, liu-liu direitu feto nian. Tamba, em prinsipiu, funsionariu hirak ne’e hatene ona konaba legal nian, maibe persiza nafatin aumenta sira nia konesimentu iha area direitu feto nian, liu-liu CEDAW. Tamba, wainhira prepara diploma lejislasaun ida, tengki iha nafatin garantia ba prinsipiu igualdade jeneru, hanesan hatúr ona iha Konstituisaun da Republika”.

Hanesan ita hotu hatene katak, Timor Leste hanesan mos Estado Parte (State Party) ida ba konvensaun internasional kontra forma hotu-hotu ba diskriminasaun hasoru feto (CEDAW ne’e). Ho ida ne’e, Estado iha obrigasaun atu garante implementasaun konvensaun refere, inklui iha parte lejislasaun nasional nian tomak. DNAJL hanesan organismu ida husi Ministério da Justiça ne’ebé ho natureza iha produsaun diploma lejislativa, iha obrigasaun atu garante implementasaun prinsipiu husi konvensaun internasional tomak ne’ebé Timor Leste ratifika ona.

“Timor Leste hatudu ona ezemplu diak tebes konaba oin nusa atu garante direitu hanesan entre feto no mane, tuir prinsipiu hirak ne’ebé hatúr ona iha konvensaun CEDAW. Husi parte lejislasaun nian mos, sempre iha garantia katak, lei ne’ebé ita produs sei la viola prinsipiu igualdade ne’e. Ho ida ne’e, liu husi formasaun hirak hanesan ne’e, sei hakbit liu tan, ita nia funsionariu sira nia konhesimentu iha parte direitu feto nian”, hatutan Diretor Vital.

Formasaun refere hanesan mos parte ida husi kapasitasaun rekursu humanus iha MJ nian. Formasaun ne’e hetan partisipasaun husi jurista/legal drafter Timor-oan hamutuk ema nain 7 no tradutor hamutuk ema nain 5. Atu informa mos katak, formasaun ne’e fasilita husi expert internasional ba árae direitu feto nian no CEDAW husi Philippina.

@Florindo