Dili - Atu iha liu tan konhesimentu diak konaba oin nusa atu prepara ou hakerek lei ida tuir regra no prosedimentu legais nian, DNAJL koopera hamutuk ho UNDP, organiza workshop ba jurista Timor-oan iha DNAJL nian laran. Workshop refere sei hala’o iha loron 2 nia laran kada semana no hahú hala’o tiha ona iha loron 24 Outubro 2013. Tuir planu, workshop ne’e sei hala’o durante fulan 3 nia laran, ne’ebé ikus mai bele hamosu livru ida konaba Manual Redasaun Lejislativa nian.

Tuir Diretor DNAJL, Nelinho Vital katak: “objetivu bot husi workshop ida ne’e, maka oin nusa Timor Leste atu iha nia manual redasaun lejislativa rasik, ne’ebé halo ou produs rasik duni husi ema Timor oan sira, atu nune’e manual ne’e bele sai hanesan matadalan ida, ba hakerek lejislasaun (lei no decreto lei) iha ita nia rai. Tamba ne’e, maka iha workshop ne’e (ne’ebé hetan tulun husi konsultora internasional ida), lejislador sira ne’ebe halibur aan iha DNAJL sei partisipa ativu liu, hodi halo analiza ba lejislasaun ne’ebe iha ona nomos atu tau hanoin hamutuk konaba hakerek manual refere”.

Hanesan ita hotu hatene katak, to;o ohin loron, ita sei iha deit regra jerais konaba hakerek lejislasaun ruma. Liu husi workshop refere, ita iha espektativa katak, ita sei produs rasik manual ida ne’ebé sai hanesan matadalan ba ita hodi prepara lejislasaun ruma. Durante loron hira hala’o workshop ne’e, iha diskusaun maka’as iha parte direitu konstituisional nian nomos konaba regra lejisltika ne’e rasik, ne’ebé durante ne’e aplika iha Timor Leste.

Tuir planu, wainhira remata ona workshop ne’e, DNAJL ne’ebé hetan tulun husi UNDP, sei prepara matadalan ne’e hodi ba aprezenta iha Conselho Ministro. Ho hanoin ida katak, ho manual refere bele ajuda diak liu tan lejislador sira (tantu ema Timor ou ema estranjeiru) konaba sistema hakerek lejislasaun iha Timor Leste.

@Florindo-DNAJL