Edificio Ministeriu Justiça, Vise Ministru Justiça Ivo Valente, hamutuk ho Director DNDHC Dr. Celito Cardoso, ho Dr. Vasco noo representante DNAJL Dr. Pascoal, simu vizita husi fundasaun ALOLA Dr. Maria Barreto, husi ALOLA, no grupo sosiedade Civil ( nebe komposto husi NGO balun, hanesan PRADET, JSMP, no seluk seluk tan ), nebe halao knaar atu kombate trafiku humano, halao sorumutu iha sala reuniaun Ministeriu Justiça, kaikoli Dili, loron 30 de Outobru 2013.

Sorumutu ne representante fundasaun Alola hatoo informasaun (Up-date) ba Ministeriu Justiça konaba Lei trafiku humanu nebe proposta iha ona Ministeriu Justiça, maibe seidauk bele lori ba aprovasaun tan sei iha faze diskusaun.

Sorumutu ne ho objectivu atu hatoo rekomendasaun ba Governo konaba artigos balun nebe perzisa hadia, tuir pontu de vista ka opiniaun husi sosiedade sivil, hanesan assunto konaba papel kada ministeriu nebe responsavel ba vitima trafiku humanu nian, nune mos oinsa maka Ministeriu sira nia responsabilidade atu koordena malu hodi fo tulun ba vitima trafiku humanu, nune mos koalia konaba oinsa Lei ne bele protégé sosiedade sivil iha assaun defende vitima ba krime ida nee, nune mos papel prevensaun ba krime nebe iha karakter trans nasional.

Iha nia intervensaun, Vise Ministru explika, konaba assunto sira nebe sosiedade sivil preukupa, hodi dehan katak, wainhira hare ka interpreta lei ka projectu de lei ruma, tenki hare ka artikula mos ho lei sira seluk nebe bele aplika ho diak, ho nune, Ministeriu da Justiça, simu rekomendasaun sira ne, hodi informa ba grupo trabalho nee, katak ,sei iha diskusaun teknika hodi hare se rekomendasaun sira ne adekuadu atu bele konsidera noo hatama iha projectu de lei ne, ka la percisa, depende mos ba konteudu ba lei ne rasik.

Nune hein mos katak hafoin projectu de lei ne prontu ho redasaun final, sei bele iha tan diskusaun ida klean entre sosiedade sivil no Ministeriu Justiça, hodi hare pontus balun atu ajusta, nune Ivo Valente hateten katak, wainhira lei ne aprova, nudar lei nebe sai hanesan produtu hamutuk, entidades estado Timor-Leste nian, ho nune tanto Governo no sosiedade sivil, tenki iha responsabilidade ida hanesan atu implementa lei ne ho diak ! espera Vise Ministru nee…enkontru nebe hahu tuku 15.00 remata iha 16.40. oras Timor-Leste.