1. Atu haklaken espiritu direitos humanos no lei seluk ne’ebé relavante ho servisu polisia nian, DNDHC servisu hamutuk ho PDHJ, HRTJS-UNMIT, Assossiasaun HAK, FOKUPERS, REDE FETO no Academia PNTL hala’o kontinusaun treinamentu ba membros PNTL iha Distritos kona-ba Knar PNTL nian bazea ba lei no direitos humanos. Treinamentu ida ne’e hala’o iha loron 1-4 Abril 2008 iha Distrito Manatuto ho partisipasaun husi membrus hamutuk ema nain 30. Treinador ba iha treinamentu ne’e mai husi instituisaun hotu ne’ebé involve an iha grupu servisu ne’e. Sr. Sebastião Ximenes, Provedor Direitos Humanos e Justiça maka halo abertura ba treinamentu ida ne’e.

2. Implementasaun ba programa treinamentu ba PNTL kona-ba direitos humanos no lei aplikavél seluk ne’ebé relasiona ho servisu PNTL nian rasik ne’e hala’o mós ba iha Distrito Oecusse. Programa treinamentu ne’e hala’o iha loron 19-25 Abril 2008 ne’ebé loke offisialmente husi S.Exa. Drª. Lucia Maria Brandão Freitas Lobato, Ministra da Justiça, no akompanha husi Dr. Sebastião Dias Ximenes, Provedor Direitos Humanos e Justiça no Dr. Ivo Jorge Valente, Adjunto Procurador Geral da República. Iha partisipasaun husi membros PNTL hamutuk ema nain 30 iha treinamentu ida ne’e ho intensaun diak tamba treinamentu hanesan ne’e foin halaó ba dala uluk iha Distrito Oecusse. Nomos mosu prekupasaun husi membros PNTL durante treinamentu ne’e katak sira presiza tebes informasaun kona-ba direitos humanos no lei sira seluk ne’ebé tama ona iha vigor.