5.1. Bazea ba Decreto Lei No 10/2005 kona ba loron feriados nasional no loron komemorativu, Governu hanesan tinan-tinan sei komemora loron 1 de Junho hanesan loron mundial ba labarik nian. Ministério da Justiça liu husi DNDHC servisu hamutuk instituisaun governo seluk hanesan edukasaun, social,saude, seguransa, desporto no arte nian, inklui mos sosiadade sivil hanesan FTM, PRADET, BA FUTURU, PLAN International, CARE International, CVTL, nomos UNICEF organiza atividades oin-oin iha nivel sentral to’o nivel distritais. Atividades hirak ne’e hanesan kompetisaun desporto (voly, dada tali), kompetisaun dezenho, kompetisaun muzika, kompetisaun deskursu (pidato), misa agredesimentu no animasaun ho marsha hamutuk no divertementu. Iha nível distrito, komemorasaun ne’e hala’o ho atividades oi-oin ne’ebé organiza husi Ponto Vocal Direitos Humanos distrito nian. Ba tinan ida ne’e, DNDHC servisu hamutuk mós ho Escola Secundaria 10 Dezembro – Comoro. Iha loron ida ne’e mos, Governo liu husi Ministério da Justiça publika ofisialmente katak, agora daudaun, nasaun Timor-Leste iha ona Komisaun Nasional ba Direito Labaraik (KNDL) nian.

KNDL ne’e rasik agora estabelese iha Direcção Nacional dos Direitos Humanos e Cidadania – Ministério da Justiça nian. KNDL nian servisu atu halo promosaun no proteksaun ba direitu labarik sira nian.

5.2. Hanesan parte ida husi disseminasaun informasaun kona-ba direitos humanos, liu-liu ba Konvensaun 7 direitos humanos nian ne’ebé Timor-Leste ratifika tiha ona ne’e, iha loron 26 de Junho DNDHC servisu hamutuk ho instituisaun direitos humanos seluk halo komemorasaun ba loron mundial kontra tortura, hanesan mós nasaun seluk iha mundo ne’e halo iha loron ida ne’e. Ho suporta husi Saude Mental-Ministério da Saúde, PDHJ, Assossiasaun HAK, ASSEPOL, PRADET, ICMC no Academia PNTL hodi hala’o atividades hanesan seminariu loron ida ba membru PNTL no F-FDTL kona ba Konvensaun Kontra Tortura no nia lalao’k iha Timor-Leste.