Prizaun Bekora,Dili, Vise Ministru Justiça Sr. Ivo Valente entrega oficialmente e simbolikamente uniforme ka farda no atributos hamutuk 18 ba Guarda prizional iha Centru Detensaun ka prizaun Bekora Dili, ohin, marka presenca iha cerimonia nee, Director Geral Ministeriu Justiça Director Nasional ba Prizaun, chefes estabelesimentu guarda prizaun Bekora no Gleno, hamutuk ho Sosiedade sivil ( Rede servisu ba rai), hanesan representantes husi instituisaun estadu balun hamutuk ho Igreja, loron 28 Agusto 2013.
Serimonia nebe marka ho marxha de parada husi Guarda prizional Bekora no Gleno, hatudu reprezentasaun husi guarda sira, nebe nain 9 simu simbolikamente atributes / nudar deviza ba sira nia pozisaun iha karreira especial ba guarda prizional. Iha entrega nee, Vise Ministru Justiça entrega mos Medalha de honra ba Instituisaun ida nee husi Eix Presidente da Republika Dr. Jose Ramos Horta, tamba prestasaun nebe diak tebes husi guarda prizional tomak wainhira atua iha situasan krize tinan 2006.

Uniforme refere iha type oin-oin, nebe hanaran PDL ( Liman naruk) PDH Liman badak, kamizolas liman badak, noo naruk, no atribute seluk 2 tan, iha intervensaun badak, Vise Ministru Justiça Sr. Ivo Valente, Louva servisus nebe halao husi guarda prizional sira, husu atu sira kontinua servisu makaas maske sei hasoru desafius balun iha terreno, informa mos ba partisipantes hotu katak, Ministeriu da Justiça planeia noo tau ona orcamento balun atu sosa kareta celular ( kareta nebe lori prizioneirios sira ) hamutuk 3, hodi fasilita servisus prizional nian iha tinan sira oin mai, nune mos husu ba Parlamentu Nasional atu bele konsidera pedidu ne tamba kareta nebe iha hahu at no nia manutensaun boot tebes.

Vise Ministru Justiça Sr. Ivo Valente, mos refere ba rekalifikasaun ba postus sira iha karreira guarda prizional nian, nebe planeia atu hahu tinan oin. Hein katak guarda prizional nain 193 nebe iha dadauk servisu bele tuir ne passa hotu, hare ba kapasidade prizaun 2 nebe egistente, Governu hahu tinan ne sei prosesa tenderizasaun ba rehabilitasaun prizaun Suai.

Remata tiha serimonia de entrega, Vise Ministru Justiça Sr. Ivo Valente, hasai fotografias ho Guarda prizional sira no hamutuk mos ho prizioneirios balun nebe toka muzikas iha resinto prizaun Bekora, antes de fila, sei han hamutuk ho partisipantes tomak iha Serimonia ida ne.

Suksesu e parabens ba servisus Guarda Prizional nian.