DÍLI, MJ—Segunda-Feira (19/02/2024), S.E. Ministru Justisa Dr. Sérgio de Jesus Fernandes da Costa Hornai, hamutuk ho Grupu Traballu Reforma Setor Justisa, hala’o sorumutu ho Primeiru Ministru (PM) Kay Rala Xanana Gusmão.
Objetivu husi sorumutu ida ne'e, atu prepara relatóriu no rekomendasaun konkreta hodi entrega ba governu.
Asuntu hirak hato'o husi Primeiru Ministru durante hala’o enkontru ho Koordenadora Grupo Traballu Reforma Setór Justisa, Dra Lúcia Lobato, ne'ebé akompaña husi Ministru Justisa, Eis Prezidente Tribunál, Rekursu, Dr. Cláudio Ximenes, Paula Fernando -CES-Coimbra, Portugál, Patrick Keuleers  husi UNDP, Miguel Lemos - Konsultór UNDP, Sahe Silva  Konsultór UNDP no Bruno Lencastre husi UNDP.
Koordenadora Grupu Traballu Reforma Setór Justisa, Dra Lúcia Lobato, esplika, grupu traballu harii husi Primeiru Ministru iha tinan 2023, atu ajuda hadi’a no reforma sistema justisa. Grupu ne’e sei halo diagnostiku ba justisa, apoiu husi parseiru internasionál sira hanesan, Programa Dezenvolvimentu Nasaun Unida (UNDP), ne’ebé sira rekruta matenek na’in lubuk ida hodi apoia Timor-oan sira.
Iha intrevista Xefe grupu traballu hatete, ne'ebé grupu traballu apoiu Governu atu prepara rekomendasaun konkreta, Primeiru Ministru husu atu grupu traballu atu aprezenta rekomendasaun konkreta, no lakohi relatóriu naruk ne'ebé iha rekomendasaun kurtu prazu ne'ebé mak governo tenke implementa kedas, tenke iha mós rekomendasaun mediu no longu prazu

Molok hasoru PM Xanana, sira hasoru uluk Prezidente Tribunal Rrekursu, Dr. Deolindo dos Santos, no sei hala’o mós reuniaun ho Ministru Justisa, Dr. Sergio Hornai, Prezidente Repúblika, Bangkada Parlamentár, akademiku, advogadu privadu, sosiedade sivil, emprezariu, grupu feto, atividade kona direitu labarik
Objetivu ko’alia ho Prezidente Tribunál Rekursu (PTR) no Primeiru Ministru Xanana, hodi haree kona-ba apoiu formasaun rekursu umanu ba entidades Timor-oan ne’ebé servisu iha área judisiariu nian.
Nia hatutan, ne’e tenke tau atensaun maka'as hodi oinsa reforsa rekursu umanu iha setor justisa, no iha lei lubuk oan ida tenke hadi’a halo lei foun balu, no lei balun ne'ebé tenke hasai tiha, tanba la kondus ho realidade nasaun nian no hadi’a no dezenvolve infraestrutura setor justisa nian.
Entretantu, grupu traballu ne’e servisu to’o fulan Marsu 2023, Primeiru Ministru husu labele lalais, tanba lalais sei lufu-lafu de’it, maibé mós labele dada naruk tanba governu iha programa ida ne’ebé atu kumpre, tanba servisu grupu traballu ne’e importante tebes atu ajuda governu reforma setór justisa atu nune’e tribunál sira bele servisu no hatán ba povu tomak nia preokupasaun katak, asesu ba justisa tenke ba ema hotu no tribunál sira nia servisu atu garante justisa ba nasaun nia di’ak.