Sekretáriu Estadu Terras Propriedades (SETP), Jaime Xavier Lopes, iha loron 28 fulan-Agostu 2023 foinlalais ne’e hala’o enkontru ho Dirijente no funsionáriu sira iha Diresaun Servisu Terras Propriedades Munisípiu Bobonaro.
Durante enkontru ho funsionáriu sira, Membru IX Governu Constitusionál husu ba funsionáriu sira atu bele tama servisu ho pontualidade, nune’e mós tenki halo atendemintu ne’ebé mak dignu ba iha sidadaun sira, liu-liu ba sira ne’ebé mak atu mai trata sira nia dokumentu ruma iha Terras Propriedades.
Membru Governu ne’e husu ba dirijente no funsionariu sira iha nivel munuissipal nian atu bele halo levantamentu ba rai no uma estadu sira ne’ebé mak durante ne’e seidauk regulariza hodi bele selu renda ba estadu.

Iha biban ne’e nia husu ba Funsionariu sira atu bele ba foti dadus hodi bele regulariza sidadaun sira ne’ebé mak okupa rai hodi harí restaurante iha tasi-ibun Postu Administrativu Atabae nian, tanba tuir lei, distansia 25 metru hosi tasi-ibun mai rai maran ne’e estadu nian tanba konsidera dominio publiku estadu nian.
Iha okaziaun ne’e Jaime husu ba dirijente no funsionáriu sira atu prepara-an tanba, tuir planu IX Governu Constitusional nian, iha tinan sira tuirmai sei implenta desetralizasaun, bainhria desentralizasaun ne’e la’o duni entaun presiza rekursu hodi bele fo apoiu servisu iha Diresaun Terras Propriedades Munisipiu sira.

Nia mós hateten, tuir planu Ministériu Justisa nian, Diresaun Terras Prorpeidades Munisipiu sei abraze to’o iha Nivél Postu sira, tanba ne’e, kada postu iha futuru presiza tau funsionariu terras nian nain rua.
Hatan ba prekupasaun Dirijente no funsionáriu sira nian, SETP hateten, sei tau konsiderasaun ba prekupasaun hirak ne’ebé mak hato’o hosi dirijente no funsionariu sira, hodi bele tau iha planu Orsamentu Geral do Estado 2024 nian.

Iha fatin hanesan diretór Terras Propriedades Munsípiu Bobonaro, Casrto Laco Martins hateten, DSTP Munisípiu bobonaro oras ne’e daudaun presiza halo rehabilitasaun ba iha edifisiu terras nian tanba kondisaun ladun di’ak, presiza mós ekipamentu estkritóriu nian no ekipamentu eletrónika sira hanesan komputadór no printer, tanba ekipamentu hirak ne’ebé mak diresaun terras propriedades Bobonaro uza hahú ona hosi tempu UNTAET nian, tanba ne’e ho membru governu foun nia fiar sei iha mudansa rum aba iha servisu sira.
Hafoin enkontru ho funsionariu sira iha DSTP Bobonaro, SETP hala’o mós vizita ba iha Diresaun Servisu Rejistu Notariadu Munisípiu Bobonaro hodi haree direta prosesu atendimentu funsionariu nian ba iha rekerente sira.*