Sekretáriu Estadu Terras Prorpiedades (SETP), Mario Ximenes iha loron 19 fulan-Janeiru 2021 foin lalais ne’e Marka enkontru ho Primeiru Ministru Timor-Leste, Taur Matan Ruak hodi relata servisu Terras Propriedades nian ne’ebé mak durante ne’e hala’o tuir planu VIII Governu iha Palácio do Governo.
Iha enkontru ho PM durante oras ida nia laran ne’e, SETP informa servisu hirak mak durante ne’e hala’o iha Terras Propriedade tuir planu Governasaun dahualuk nian.
Membru Governu ne’e infora mós kona-bá rendimentu ne’ebé Durante ne’e Terras Propriedades rekolla liuhosi kontratu arrendamentu entre estadu ho sidadaun sira inklui mós instituisaun sira.

“Primeriu Ministru (PM) bolu ha’u tanba hakarak hatene ami-nia servisu loron-loron, ami nia servisu mak haree liu-ba propriedade estadu. Tanba ne’e, hanesan mebru Governu ida hetan orientasaun hosi nia superiór hodi haree ba polítika VIII Governu nian hakarak atinji objetivu rendimentu sustentável no mós absove traballadór sira,” dehan membru governu ne’e hafoin marka enkontru ho Primeiru Ministru.
Membru governasaun daualuk ne’e hateten, mezmu iha tinan 2019 to’o 2020 governu hasoru situasaun difísil, hanesan situsaun polítika la estável no situasaun COVID-19 maibé Terras no Propriedades nafatin hatama rendimentu ba kofre estadu.

Mario Ximenes hateten, kona-bá rendimentu ne’ebé Terras Propriedades hetan hosi arrendatariu sira, bainhira halo komparasaun entre Governasaun agora ho governtasaun anteriór, governasaun agora hatama reseita ba estadu liuhosi terras propriedades liu-liu iha tinan 2019-2020 hatama reseita ho totál US$ 4,2 Milloens iha governasaun anteriór kada tinan atinji de’it US$ 2 milloens to’o 3 milloens.
Iha biban ne’e nia mós husu apoiu hosi Primeiru Ministru hodi bele atinji di’ak liutan tuir planu VIII Governu nian. Hafoin relata atividades no Terras Propriedades nian, Primeriu Ministru mós apresia servisu SETP nian ne’ebé mak durante ne’e hala’o.*