Ministériu Justisa reprezenta husi Vise-Ministru Justisa komemora loron direitus humanus iha Postu Administrativu Tutuala Munisipiu Lautem, iha loron 10 Dezembru 2020. Atividade ne’e partisipa husi komunidade, lider komunitariu, autoridade lokál, autoridade seguransa eskuadra Tutuala inklui Ofisiál Polisia Suco (OPS), professores no estudante sira.


Atividade komemorasaun ne’e konkretiza ho divulgasaun ba Lei Nú. 13/2017 Rejime Espesiál ba Definisaun ba Titularidade Bein Imovel, Lei Nú. 8/2017 kona-ba Espropriasaun ba Utilidade Públika ho Lei Nú. 7/2010 kona-ba Lei Kontra Violénsia Doméstika.



Atividade divulgasaun ne’e, abertura husi Sua Exélensia Vise-Ministru Justisa. Divulgasaun lei sira aprezenta husi Xefe Departamentu Polítika Lejilativa-DNAJL aprezenta kona-ba Rejime Espesiál ba Titularidade Bein Imovél. DNDHC aprezenta kona-ba Lei Espropriasaun ba Utilidade Públika Diretór no Materia kona-ba Lei Kontra Violénsia Doméstika aprezenta husi funsionariu DNDHC.


Iha diskusaun kona-ba materia ne’ebé aprezenta hamosu perguntas barak liu refere ba asuntu direitu ba rai “Nain ba Rai no Rai Nain”.

Iha sesaun diskusaun nota katak asuntu rai sai preokupasaun boot liu husi komunidade sira kona-ba prosesu sukat rai no rejistu sai Nain Ba Rai. Dezintendimentu komunidade iha kontestu rai komunitariu, rai ne’ebé ema seluk hela no ema seluk maka sukat nu’udar nain, kestaun hirak ne’e halo komunidade duvida ho prezensa lei ne’e.

Iha sesaun enseramentu Administrador Postu Administrativu Tutuala apresia prezensa Ministériu Justisa tanba eskoilla postu Tutuala sai fatin komemorasaun loron direitus humanus. Administrador husu ba Ministériu Justisa atu kontinua atividade sensibilizaun ba Rejime Espesiál ba Definisaun ba Titularidade Bein Imovel atu nune’e bele ajuda komunidade kontribui ba rezolusaun disputa rai iha futuru.