MINISTÉRIU JUSTISA HO PDHJ REALIZA DISKUSAUN DAHULUK BA PREVENSAUN TORTURA

Dili, 05 November 2020 Ministériu Justisa (MJ) ho Provedoria Direitus Humanus no Justisa (PDHJ) realiza diskusaun grupu foku hodi dezenvolve manual formasaun ba prevensaun tortura.

Atividade diskusaun ne’e, kontinuasaun husi Nota Entedimentu ne’ebé estabelese entre PDHJ ho Ministériu Justisa iha 06 Outubru 2020.

Iha diskursu Provedora Interina Dra. Benicia Eriana Magno hateten “Atividade ne’e atu prevene aktu tortura, tanba proibisaun tortura iha kuadru jurídiku nasionál seidauk konsistente tuir padraun internasionál ba tortura nia definisaun. Medida Nasionál estadu halo ona, tanba ne’e metodu prevensaun ba Tortura no Violénsia Bazeia Jéneru inkorpora hotu iha planu asaun atu dezenvolve iha futuru”.

Iha diskursu abertura, Sua Exa Vise-Ministru Justisa Dr. Jose Edmundo Caetano konfirma atividade diskusaun ne’e nu’udar rezultadu husi Nota Entendimentu entre Ministériu Justisa ho PDHJ. Sua Exa Vise-Ministru Justisa hateten “Husi Nota Entedimentu ne’e atu bele dezenvolve metodu prevensaun ba aktu tortura no respeita direitus humanus. Lei ne’ebé la espesifika hodi kontribui ba prevensaun tortura, tenke konsidera nu’udar nesesidade ba alterasaun iha futuru”.

Iha atividade ne’e partisipa husi Guarda Prizionál, marka prezensa mos iha atividade ne’e ekipa Promosaun no Edukasaun PDHJ, Diresaun DNSPRS, Diresaun DNDHC no Asesor Gabinete Vise Ministru Justisa.

Ne’e mak atividade dahuluk iha Estabelesimentu Prizionál Becora, atividade hanesan sei kontinua ba Estabelesimentu Prizionál Gleno ho Estabelesimentu Prizionál Suai.

Media Gabinete Vice MJ