SETP partisipa komemorasun loron mundiál feto rural iha Laulara


SEKRETÁRIU Estadu Terras Propriedades (SETP), Mario Ximenes iha loron 15 fulan-Outubro 2020 foin lalais ne’e partisipa iha loron mundiál ba feto rurál ho tema “Haforsa rezilénsia feto rurál hasoru mudansa klimátika,” iha aldeia Binona, Suku Kotolau, Postu Administrativu Laulara, Munisípiu Aileu.
“Ho komemorasaun loron mundiál feto rurál ne’e ha’u kongratula feto rurál iha mundu liu-liu feto rurál iha Timór-Leste,” hateten Espoza Prezidente Repúblika Timor-Leste, Cidalia Mouzinho Nobre Guterres bainhira partisipa iha selebrasaun loron mundiál feto rurál ne’ebé komemora iha Postu Administrativu Laulara Munisípiu Aileu.

Iha selebrasaun loron mundiál ne’e rasik, hetan antuziasmu no partisipasaun másimu husi Komunidade Suku Laulara, inklui mós estudante no entidade estadu nian sira iha munisíu Aileuno espoza Prezidente Repúblika hamutuk ho membru Governu sira.
Iha selebrasaun ne’e Espoza PR hatetetn, estadu presiza fó atensaun makás liu-tan ba programa promosaun ba igualdade jéneru espesiál atu hakbít labarik feto sira iha Timór-Leste.
Cidalia hateten, prinsipalmente ba labarik feto sira iha área rurál atu goza sira nia diretu ne’ebé mak konsagra ona iha konstituisaun RDTL artigu 16, 17 no 18, instrumentu sira hanesan konvensaun Nasaun Unidos (UN) ba diretu labarik no konvensaun atu halakon diskriminasaun hotu-hotu hasoru feto (CEDAW).

“Ita hotu rekoñese feto sira mak nu’udar forsa traballu iha área agrikutura, komérsiu no servisu informál seluk tan, tanba ne’e haktuir ba enkudramentu legál Nasionál no Internasionál oi-oin hodi enkoraja no motiva kuantidade no kualidade produsaun feto sira-nian,” dehan espoza Prezidente Repúblika.
Hafoin selebrasaun espoza prezidente hamutuk ho membru governu inklui ajensia internasionál sira sira entrega ai-horis ba komunidade Laulara ne’ebé reprezenta hosi lideransa komunitária sira, iha biban ne’e komunidade Laulara hamutuk ho estudante sira halo mós espozisaun ba artezenatu, kulinaria ai-han lokál, no mós kompetisaun sa’e bua.

Iha biban ne’e Sekretáriu Estadu Terras Propriedades (SETP) Mario Ximenes hateten hanesan membru governu nia parte hakarak hato’o mós ninia votus parabéns ba feto rurál sira hotu iha mundu liu-liu ba inan-feton rurál sira hotu mak namkari iha teritóriu Timór-Leste.
Seremónia ne’e rasik organiza husi Gabinete Prezidensia Repúblika no hetan apoiu husi PLAN internasionál, CDC, HAFOTI, Komisaun SADIA no Autoridade Munisípiu Aileu no hetan partisipasaun masimu husi reprejentante liñas ministeriais, Sosidade Sivil, parseria dezenvolvimentu sira no hetan seguransa másimu husi PNTL (Polísia Nasionál Timor-Leste) Munisipiu Aileu.

Ananias Babo Horta
Relasaun Públika SETP