Bobonaro-Sekretáriu Estadu Terras Propriedades (SETP) Mario Ximenes, iha loron 2 fulan-Setembru 2020 foin lalais ne’e hala’o vizita servisu ho urjenti ba Diresaun Terras Propriedades (DTP) Munisípiu Bobonaro hodi bele haree besik liutan funsionamentu servisu diresaun nian iha munisípiu.
Iha vizita durante loron ida ne’e, SETP hateten, nia parte hala’o vizita servisu ba DTP Munisípiu nian ne’e hodi haree besik liutan servisu funsionáriu sira nian.
Iha vizita ne’e nia husu ba funsionáriu sira atu bele ezerse ninia funsaun ho di’ak, no hala’o atendimentu ne’ebé di’ak ba sidadaun sira, mezmu halo atendimentu ba públiku maibé nia parte husu ba funsionáriu sira ne’ebé hala’o atendimentu ba públiku tenki mantein nafatin distansia sosiál, tanba mundu inklui Timor-Leste iha hela situasaun COVID-19.

Vizita urjenti urjenti ne’ebé hala’o hosi SETP ba DTP Bobonaro ne’e, identifika diretamente funsionáriu hirak ne’ebé la tama servisu no hirak ne’ebé fila sedu. No iha vizita ne’e SETP hasoru-malu ho pesoál finansas DTP ninan no funsionáriu sira seluk la iha fatin inklui Diretór Terras Propriedade Bobonaro ne’ebé assume kargu iha loron 4 fulan-Agostu 2020.
Durante vizita, STP husu mós informasaun funsionáriu sira nian ba pesoál finansas ne’ebé prezenti, hodi hato’o mós objetivu vizita SETP nian ba funsionáriu refere.
“Ha’u mai halo vizita ne’e hanesan surpreza ida ba ita-boot sira hodi haree diretamente lala’ok prezensa funsioáriu sira nian iha diresaun terras munisipaís nian. No vizita hanesan ha’u ho ekipa sei halo mós ba munisípiu seluk,” tenik Mario Ximenes.
Hafoin oras balu nia laran SETP hasoru-malu mós ho diretór sesante DTP Bobonaro atuál Diretór DTP manufahi no Diretór Conservatóriu Rejistu Notariadu Munisípiu Bobonaro.

Iha biban ne’e, Diretór Sesante DTP Munisípiu Bobonaro no atuál Diretór DTP Manufahi, Damião Fontes Lobato informa mós situasaun diresaun Terras Munisípiu nian ba SETP.
Damião hateten, iha edifísiu DTP Bobonaro presiza tau atensaun liu-liu ba materiais eskritóriu nian, hanesan meza, kadeira, komputadór no mós Gorden (kurtiña-red) tanba ne’e nia parte husu ba SETP atu mós iha planu orsamentu Jeral Estadu 2021 nian.*