Vise Ministru Justisa Hala’o atividade iha Prizaun Bekora Hodi Komemora Loron Falintil ba dala 45, Hamutuk ho Prizioneirus sira


Díli, 21 Agostu 2020
Vise Ministru Justisa, Sr. José Edmundo Caetano, hala’o atividade iha Prizaun Bekora, Dili, hodi Komemora Loron Falintil ba dala 45, hamotuk ho Prizioneirus sira.
Iha atividade ida ne’e halibur dadur sira liu husi jinastiku zumba, no mos anima ho muzika ba Prizioneirus sira iha, Prizaun Bekora, Díli, sexta-feira ne’e,
Iha atividade ne’e Vise Ministru Justisa, Sr. José Edmundo Caetano, akompanha mos hosi nia Espoza, no Assesor Politika Sr. Juvinal.
Objetivu vizita ne’e, hodi Selebra Loron Falintil ba dala 45, no hetan animasaun husi Grupu Zumba Díli no artista timor oan sira.

Vise Ministru Justisa, Sr. José Edmundo Caetano hatete, atividade ne’e nia objetivu principal maka atu fo ksolok no hatudu dalan moris ho saudavel, liu husi jinastiku zumba no animasaun.
‘’Atividade ida ne’e, hanesan atividade ida ne’ebe maka prinsipal, halai liu kona-ba moris saudavel nian, no atividade ida ne’e ho nia objetivu hanesan orientasaun ba iha prizaun, atu dadur sira bele hetan animasaun, nune’e dadur sira senti katak atividade ne’e di’ak duni ba sira.
Atividade ne’e husi parte ida mos saudavel ba sira, no mos evita husi sintomas stress, depresaun ba dadur sira durante sira kumpri pena iha prizaun. Nune’e atividade ne’e pozitivu, no ba oin tenki kontinua nafatin semana ida dala ida ou kada sexta feira iha Prizaun tolu (3) hanesan, Prizaun Becora-Díli, Suai, no Gleno.

Entretantu, Diretor Prizaun Becora, João Domingos, agradese ba inisiativa hosi Vise Ministru Justisa, hodi Komemora Loron Asuwain Falintil, no halo animasaun ba dadur sira, ho Tema KONTENTI HO DESPORTU HAMUTUK HO GUARDA PRIZIONAIS SIRA
Total prizioneirus sira iha Prizaun, Becora, Díli, Hamutuk Atus Lima Haat nulu Resin Hitu, no Guarda Prizionais hamutuk Atus Ida, Tolu nulu Resin Haat.

Media Gabinete Vice MJ