Dili,19 Agostu 2020 : Vise Ministru Justisa, Sr. José Edmundo Caetano ho ekipa Ministerio nian,hala’o enkontru ho Vise Ministru Saúde Sr. Bonífacio Maucoli dos Reis, iha Salaun enkontru Gabinete Vice Ministro da saude, Palácio das Cinza Caicoli, Díli.
Iha enkontru ne’e Vise Ministru Justisa, Sr. José Edmundo Caetano hato’o programa ida integradu iha area asistensia mediku iha estabelesimentu prizionais, liu-liu ba rekursu humanus mediku nian ( doutor mediku, psikiater) ba dadur sira moras iha prizaun no mos ba dadur sira nebe iha moras mental nebe kumpri medida seguransa. Ba mediku sira ne’e hodi fo asistensia mediku ba dadur sira, no presija ekipamentus mediku nian, no mos ajuda transporte ambulansia iha prizaun tolu hodi apoiu ou fasilita kuandu dadur sira moras todan ou urjenti.
Vise Ministru Saúde Sr. Bonífacio Maucoli dos Reis hatete, enkontru ohin koalia kona-ba Planu alargamentu ba sala assisténsia médika, no aumeta profesionais Saúde hodi aloka ba Prizioneirus sira iha Prizaun Díli, Gleno, Suai, no mós ba rekursu umanus.

Husi parte rekursu umanus professionais saúde presiza atu halo atendementu ba sira ho kualidade, adekuadu no atendementu ba ema hotu.
‘’Ita sei koloka professional saúde sira tuir area idak-idak nian, hanesan ba iha saúde mental fahe ba parte rua, balun ho moras mental, no balun moras agresivu, tanba ita hatene sira ne’ebé iha prizaun sira normalmente sempre sofre moras mental, nune’e ema ne’ebe maka ho moras mental tenke hetan atensaun espesial liu.
Profesional sira ne’e, ita sei prepara hodi aloka ba iha prizioneiru sira iha Prizaun Becora, Gleno, no Suai hodi fó atendementu ba sira ho kualidade, no adekuadu. Maibe oinsa maka atu disponibiliza fatin ruma, atu nune’e pessoal saúde sira wain hira koloka ba fatin referre sira iha ona fatin hodi halo atendementu ba prizioneirus sira.
Desizaun ikus hosi enkontru ne’e rasik tuir planu sei halo Nota Entedementu entre parte rua hodi nune’e bele kompleta malu iha area ne’ebe presiza.
Iha enkontru ne’e partisipa husi ekipa Ministeriu Justisa maka : Assessor Programa Sr. Venancio, Assesor Direito Humanos Sr.Ossorio, no Assesor Politiku Sr.Juvinal.
Entretantu husi ekipa saúde akompanha hosi Diretora Jéral Prestasaun Saúde, Dra. Odete Viegas, Gabinete Diretor Planu Polítika Kooperasaun Sr. Narsicio Fernandes, Diretora Rekursu Umanus Sra. Tomazia Sousa, Assesor MdS Dr.Avelino Correia.