SEKRETÁRIU -Estadu Terras Propriedades (SETP) Mario Ximenes hamutuk ho Sekretáriu Estadu Komunikasaun Sosiál (SECOMS), iha loron 15 fulan-Jullu 2020, foin-lalais ne’e hala’o enkontru ho joven kreativu Arte Moris nian sira hodi aloka armajén MTCI Bebora hanesan fatin ba arte nian iha futuru.
Antes ne’e Governu liuhosi sorumutu entre SETP, Ministériu Turizmu Komunitáriu no Komunikasaun (MTCC-sigla Portugés), Sekretáriu Estadu Juventude no Desportu (SEJD) no Sekretáriu Estadu Arte no Kultura (SEAC-Sigla Portugés) hodi deside fatin ba arte moris iha futuru.

Iha enkontru entre parte governu ho Arte Moris ne’ebé hala’o iha gabinete SECOMS ne’e, SETP Mario Ximenes hateten, antes ne’e nia parte iha ona enkontru ho ministériu relevante sira hodi deside fatin ba Arte Moris.
Nia realsa mós, governu konsidera Tebes Arte moris ninia ezistensia, tanba ne’e parte governu buka oinsá hodi bele fó solusaun ba prolema fatin ne’ebé oras ne’e preokupa.
Membru governu ne’e informa mós, fatin ne’ebé daudaun utiliza hosi Arte Moris ne’e, desizaun Primeiru Ministru PM nian ba asuntu ne’ebé importante no ás tebe-tebes hanesan sekretáriu Estadu nia parte laiha obzesaun ida atu halo impedementu ba desizaun PM nian.

“Fatin ne’ebé ita-boot sira (arte moris-red) uza iha ne’ebá ne’e ha’u bele hateten sai katak, ne’e desizaun Primeiru Ministru nian, ba assuntu ne’ebé importante no ás tebetebes, hanesan Ministru no Sekretáriu Estadu ami laiha obzesaun ida hodi impede desizaun PM nian, tanba ne’e téknikamente ami buka atu fó solusaun. Nune’e, ita-boot sira sente satisfas no ami mós senti satisfas ho ami nia servisu,” tenik SETP Mario Ximenes.
SETP hateten, parte govrnu deside ona katak, fatin ba Arte Moris nian hodi hala’o sira nia atividade arte nian iha futuru mak iha Armazén Ministériu Komersiu Industria (MTCI) Bebora, Díli Timor-Leste, tanba ne’e iha tempu badak sei konvida sira hodi ba haree fatin ne’ebé iha tempu badak sei aloka ba sira (arte moris-red).
Iha enkontru ne’ebé hala’o iha Gabinete SECOM palácio do Governu ne’e, tuir Mario, la’ós deit ba Arte Moris maibé sei muda mós grupo arte sira seluk hodi konsentra hamutuk iha fatin ida.

Iha fatin hanesan, Sekretáriu Estadu Komunikasaun Sosiál, Merício Juvinal dos Reis ‘Akara’, hateten, Arte Moris mós hanesan grupo ida ne’ebé sempre kopera ho estadu, tanba ne’e nia parte smpre buka meius oinsá bele iha solusaun ba problema ne’ebé sira (arte moris-red) hasoru.
Iha biban ne’e responsavél Arte Moris mós hato’o ninia agradesimentu no solisitasaun ba iha parte governu tanba bele fó solusaun ba problema fatin ne’ebé mak durante ne’e sira hasoru, tanba ne’e ba interese nasanun nian parte Arte Moris sempre kopera ho estadu.*