Sua Exa Ministru Justisa instrue ba Diretor Jerál Servisu Rejistu ho Notariado hodi ordena Equipa Instaladora PETL hodi halo instalasaun ba Passaporte Elektróniku Timor Leste ba segunda faze nian iha Diresaun Munisipál Konservatoria Servisu Rejistu ho Notariadu Munisípiu ne’en ( Ermera, Liquiça, Aileu, Ainaro, Manufahe no Covalima).


Equipa instaladora Passaporte Eletróniku Timor Leste (PETL) nian, ne’ebé kompostu husi membro na’in hat kompostu husi: Pinso Amado Sei-Sei Vieira, Inocencio Jose Alves, Bernardino Freitas, Nelson Moniz Belo, Xefia husi Victor Neto, Diretor ba Diresaun Nasional Identifikasaun ho Rejistu Kriminal nian hahú iha loron 11 to’o loron 28 fulan Maiu 2020, ba segunda faze nian hala’o instalasaun Passaporte Eletróniku Timor Leste nian iha Diresaun Munisipál Konservatoria Servisu Rejistu ho Notariadu Munisípiu ne’en ( DMKSRN Munisípiu Ermera, Liquisa, Aileu, Ainaro, Manufahe ho Covalima).


Atividade instalasaun ne’e, hetan supervisaun direta husi Diretor Jerál Servisu Rejistu ho Notariadu nian iha DMKSRN, atu atividade instalasaun bele realiza konforme kalendáriu nebe estabelesidu.


Diretor Jerál Servisu Rejistu ho Notariadu nian, aproveita okasiaun ne’e, fo instrusaun ba Diretor Munisipál Konservatoria Servisu Rejistu ho Notariadu nian atu kuida no konserva didiak ekipamentu Informátika nian ne’ebé instaladu ba sistema PETL rasik, devidu ekipamentus hirak ne ho PETL ne rasik usa sistema informátika nebe seguru liu, modern no kompativel ho sistema ne’ebé país seluk adotado atu nune’e bele fasilita sidadaun nasional sira halo movimentasaun.
Tamba ne’e, Diretor DMKSRN Munisípiu sira orgulho bele ona halo atendimentu passaporte iha Munisípiu ida-idak. Modelo passaporte iha forma eletrónika, usa identifikadu biometrico.


Diretor Jerál Servisu Rejistu ho Notariadu nian Crisogno da Costa Neto, mos husu ba funsionarius ne’ebé mak operasionaliza sistema PETL iha kada DMKSRN nian, tenke ho kuidadu, profissional no insere ema nian dadus ba sistema tenke basea ba dadus iha Bilhete de Identidade nian.


Diretor Jerál mos sublinha tan, katak, mesmo instala ona PETL iha DMKSRN Munisípiu sira, maibe kondisoens balun sei minimu. MJ-DGSRN sei esforsu no toma responsabilidade atu melhora diak liu kondisoens fisiku hirak nebe sei minimu iha DMKSRN Munisipiu sira no sei kompleta ekipamentus informátika balun nebe presiza hodi suporta diak liu tan servisu atendimentu passaporte nian iha DMKSRN Munisípiu sira.


Diretor Jerál Servisu Rejistu ho Notariadu garante ona katak, iha Diresaun Munisipál Konservatoria Servisu Rejistu ho Notariadu Munsípiu Sanulu instala ona Passaporte Eletróniku Timor Leste. Nune’e, Sua Exa Ministru Justisa bele halo lansamentu ba alargamentu Passaporte Eletróniku Timor Leste nian. Hahú iha loron lansamentu ne’ebá, Diresaun Munisipál Konservatoria Servisu Rejistu ho Notariadu Munisípiu sanulu sei bele halo atendimentu passaporte nian komunidade sira iha Munisípiu ida-idak.


Parabens no sucesso ba Ministériu Justisa ne’ebé alarga ona Passaporte Eletróniku Timor Leste nian ba DMKSRN Munisípiu sanulu.


Figuras: DGSRN hala’o monitorizasaun ba instalasaun SNPETL iha Munisipiu ne’en :


Equipa Instaladora hala´o instalasaun PETL iha DMKSRN Munisipiu Ermera



Iha loron 18 fulan maio 2020, equipa instaldora hala’o instalasaun PETL iha DMKSRN Munisipiu Liquisa



Equipa instaladora hala’o instalasaun PETL iha DMKSRN Munisipiu Aileu, assiste diretamente husi Dir DNRN ho Diretor DMKSRN Munisipiu Aileu



Equipa instaladora hala’o instalasaun PETL iha DMKSRN Munisipiu Ainaro, iha loron 22 fulan maio 2020



Equipa instaladora hala’o instalsaun PETL iha DMKSRN Munisipiu Manufahe



Ikus liu equipa instaladora hala’o instalasaun PETL iha DMKSRN Munisipiu Covalima