CFP-MJ Realiza jornada la’o-ain hosi Turiscai- Laclubar


Komisaun Funsaun Públika (CFP-Sigla Portugés) hamutuk ho Ministériu Justisa (MJ) inklui mós liña ministeriais sira seluk iha loron 3-5 fulan Jullu 2019 realiza jornada la’o-ain hosi Suku Bermana Postu Adminstrativu Turiscai, Muniseipiu Manufahi to’o iha Postu Administrativu Laclubar hodi relembra hikas Saudozu Prezidenti Nicolau dos Reis Lobato ninia ain-fatin.
Iha jornada la’o-ain ne’e, Prezidenti CFP husu ba funsionáriu sira hotu atu ba nati tuir luta na’in sira nia ain-fatin, nune’e hanesan funsionáriu Públiku tenki valoriza mós sakrifisiu hirak ne’ebé maka saudozu sira sakrifika hodi bele halo atendementu ne’ebé di’ak ba povu sira.

Jornada ne’ebé hahu la’o-ain hosi Eskola bazika Filial Bermana, Turiscai ne’e ekipa jornada sira hahuu prepara-an iha postu turiscai, iha loron 2 fulan-Jullu 2019 semana hirak liu-bá.
Antes hahuu jornada Prezidenti CFP, Faustino Cardoso ne’ebé lidera jornada ne’e iha ninia abertura hateten, jornada la’o-ain tuir Saudozu Prezidente Nicolau dos Reis Lobato nia ain-fatin sai hanesan referensia ba funsionáriu sira hodi sai servidór estadu ne’ebé di’ak.
Hafoin jornada Eis Dekanu Fakuldade Siensia Sosiais UNTL nian ne’e hateten, objetivu prisipál hosi jornada ne’e mak oinsá funsionáriu sir abele koñese di’ak liu tan moris komunidade sira nian iha area rurais, nune’e bele hatene mós luta saudozu sira nian ba libertasaub patria.

Atu ensera, hanesan uma-na’in ba komemorasaun loron CFP ba dalima nian Ministru Justisa Manuel Cárceres hateten, hosi jornada sira hanesan ne’e, funsionáriu sira bele hasai ninia reflesaun oin-rua mak nundar servidór estadu no povu nian, hafoin haree realidade povu nia moris iha area remotas.
Ministru Justisa ba Governasaun dawaluk ninan ne’e hato’o mós ninia agradesimentu ba membru jornada nain 112 ne’ebé maka realiza jornada ho ninia distansia kilometru 48.

Ministru Justisa ne’e hateten, hanesan servidór povu nian la’ós la’o atu hatene rai de’it maibé atu fo hanoin ba funsionáriu sira katak, hanesan funsonáriu sáida mak tenki fó ba povu Timor-Leste, no sáida mak servidór povu nian sira kontribui hodi hadi’a moris di’ak povu nian.
Ekipa jornada sira hosi instituisaun 21 ho total ema nain 112 ne’ebé kompstu hosi mane nain 96 no feto nain 16 inklui mós Prezidenti Komisaun Funsaun Públika (CFP-Sigla Portugés), Saudozu Prezidente Nicolau dos Reis Lobato nia oan-mane, no Eis Eskoltu ba saudozu Prezidente nian, Manuel Atok.

Durante jornada iha loron dahuluk ninan, prezidenti CFP esplika mós kona-bá ezisténsia foho Morkoluli ne’ebé maka iha tempu rezistenisa sai hanesan sentru ba tranzmisaun dahuluk infmormasaun rai-laran nian ba iha mundu liu hosi emisaun rádiu Maubere nian.
Antes to’o iha foho morkoluli, Eis eskoltu PR Nicolau dos Reis Lobaro nian konta mós istória foto Osnaco nian no foho sira seluk ne’ebé mak sai hanesan fating a grilla iha tempu rezisténsia.

Jornada durante loron 3 ne’e ba loron dahuluk nian termina iha Aldeia Lesuata Baliza entre Suku Matorek ho Suku Fatumakerek, no jornada ba loron daruak nian termina iha Aldeia Sasahe, Suku Fatumakerek, no jornada ba loron datoluk nian termina iha Administrasaun Postu Administrativu Laclubar.
Iha enseramentu ba jornada la’o ain tuir ain-fatin saudozu Prezidenti Nicolau dos Reis Lobato nian ne’ebé ensera iha loron 5 fulan-Jullu 2019, iha salaun parokia Laclubar ne’e, Ministru Justisa entrega mós premiu balu ba membru jornada nian na’in rua ne’ebé ho idade boot liu no membru jornada ne’ebé ho idade ki’ik liu, membru nain rua ne’e ida ho idade 59 no ida ho idade 19.*

Ananias Babo Horta
Relasaun Públika DNTPSC