EXPOZISAUN NO BAZAR BARATU SAI EVENTU IDA BA SELEBRA LORON FUNSAUN PÚBLIKU BA DALA V

Ministériu Justisa (MJ) iha tinan ne’e nudar responsavel ba selebra loron funsaun públiku ba dala V. Nune’e, iha atividade lubuk ida ezekuta ona no kona-ba expozisaun no bazar baratu la’o hela dadauk iha CCD, hahu hosi loron tersa, 25 – 29 Junu 2019.

Expozisaun no Bazar Baratu hanesan tipu atividade ida ne’ebe demostra hodi atrai komunidade sira hodi hatene lalaok servisu ministeriu no orgaun estadu sira seluk liga liu ba prestasaun servisu entidade estadu sira no promosaun ba negosiu produtu lokal no seluk tan. Vizitante sira sei hetan bazar ida ne’ebe baratu, atividade hirak ne’e hala’o hodi selebra loron Funsaun Publiku ne’ebe monu iha loron 15 Julu 2019.

“Hau fo parabens ba ekipa organizador Ministeriu Justisa ne’ebe responsavel ba selebra loron funsaun publiku, sesaun hirak ne’e konkista ita nudar servidor publiku tantu iha orden demokratiku no birokratiku sai oportunidade hodi halo refleksaun hodi valoriza papel estrateziku funsionariu publiku hodi servisu hamutuk ho entidade sira seluk lori povu ba moris prosperidade.” Tenik Prezidenti Funsaun Publiku, Prof. DR. Faustino Cardoso Gomes. Msi. Iha CCD, Dili, 25 Junu 2019.
Iha fatin ho loron hanesan Ministru Justisa, Dr. Manuel Carceres da Costa hateten, “Atravez ho atividade hanesan ne’e konsolida no solidaridade no reflesaun ba ita saida mak ita tenki halo no hadia hodi hakat ba espiritu foun no funsionariu publiku tenki sai servidor povu no nasaun.”

Expoziasaun ne’e hatudu liu-liu fasilidade no prosesu servisu sira kada instituisaun estadu sira hanesan Ministeriu Saude, Bombeiros, PDHJ, MJ, MTCI, CFP, IAD, CAC nst ba komunidade katak atendimentu ba nesesidade povu nian hanesan ne’e, balun kman no susar no balun fasil, balun presija enerjia ida makas no kosar duni no balun kman la kosar ida, kada ministeriu servisu barak la hanesan, ho misaun oi-oin diferente maibe ho ejijensia hanesan serve ita nia povu no estadu ba moris prosperidade. Ba bazar baratu ne’e hanesan promosaun ida ba ita nia nogosiu ka fila liman lokal sira hodi promove produtu rai laran nst ba entidades hotu-hotu.

Eventu hirak ne’e asiste hosi entidade estadu sira hanesan Ministru Justisa, Prezidente Komisaun Funsaun Públiku, Sekretariu Estadu Komunikasaun Sosial, Providoria Direitu Umanus no Justisa, Defensor Publiku Jeral, CAC, Dirijente masimu Funsaun públiku, fila liman sira. (C)

Carmelindo da Silva Caetano
Tekniku Superior DNDHC MJ