Ministériu Justisa (MJ) liuhosi Diresaun Nasional Direitus Umanus no Cidadania (DNDHC) hala’o konsultasaun públiku hodi kontribui ba elaborasaun relatoriu estadu Timor-Leste kona-ba Paktu Internasional Direitu Ekonomia Sosial no Kultural. Atividade ne’e hala’o iha Munisipiu Lima inklui RAEOA (Reziaun Administrativu Espesial Oe-cuse – Ambeno), iha Maliana hala’o iha loron Kuarta 8 Maiu 2019, Ermera, 10 Maiu 2019 , Viqueque, 8 Maiu 2019, Manatuto,10 Maiu 2019, Manufahi, 15 Maiu 2019 no RAEOA, loron Sesta, 17 Maiu 2019.

Konsultasaun ne’e hala’o tuir atribuisaun DNDHC MJ kona-ba elabora relatoriu estadu koneksaun ho paktu internasional sira ne’ebe ita nia estadu ratifika. Tratadus hitu mak ita ratifika iha tinan 2003 ne’e inklui Paktu Internasional Direitu Ekonomia Sosial no Kultural, nune’e ita nia estadu iha obrigasaun moral hodi hala’o tuir ejijensia paktu ne’e inklui hala’o konsulta publiku hodi inkorpora iha elaborasaun relatoriu estadu.
Ba objetivu programa, Diretur DNDHC MJ, Flaviano Moniz Leao hateten, “Ami mai konsulta direita ho komunidade sira ho intensaun hetan informasaun naton hodi atribui ba elabora relatoriu estadu.”

Momentu iha Maliana Reprezentante Administrador hateten, “Hau apresia ekipa Ministeriu Justisa to’o mai iha ne’e no ita sai alvu ba konsultasaun hodi fo informasaun, nune’e hau husu komunidade sira fó informasaun lolos no momos ba ekipa sira.” Apresiasaun kuaze atu hanean mos hato’o hosi administrador munisipiu sira hanesan iha Ermera, Manatuto, Viqueque, Manufahi no RAEOA.

Prosesu konsultasaun hirak ne’e sempre hahu ho aprezentasaun badak kona-ba Paktu Internasional Direitu Ekonomi Sosial no Kultural nomos direita fahe ba grupu haat tuir area tematika haat hanesan kona-ba Moris Adekuadu, Edukasaun, Saude no Kultural ne’ebe lidera hosi fasilitador sira ne’ebe hosi ekipa DNDHC MJ inklui Asesora Direitus Umanus DNDHC. Totalidade partisipante ba konsultasaun hosi munisipiu 5 inklui RAEOA hamutuk 209.

Konsultasaun hirak ne’e partisipa hosi Administrador no Reprezentante Munisipiu Bobonaro, Ermera, Manatuto, Viqueque, Manufahi no RAEOA, asiste mos hosi PNTL, F-FDTL, Administrador Postu, Sefi Suku no komunidade sira.(C)