MINISTRU JUSTISA TIMOR-LESTE IVO VALENTE ENTREGA PASTA PREZIDENSIA CMJPLOP BA MINISTÉRIO DA JUSTIÇA E SEGURANÇA PÚBLICA BRAZIL IHA BRASÍLIA

Versão para impressão

BRASÍLIA, CMJPLOP – S.E. Ministru Justisa Timor Leste, Ivo Valente entrega pasta Prezidensia Conferência dos Ministros da Justiça dos Países de Língua Oficial Portuguesa (CMJPLOP) ba Ministro da Justiça e Segurança Pública iha Brasil, Sr. Torquato Lorena Jardim  iha loron Kinta-Feira (29/06/2017) foin lalais ne’e iha iha Palácio da Justiça, Kapitál Brazil, Brasília.

Serimónia sesaun solone de abertura XV Conferência dos Ministros da Justiça dos Países de Língua Oficial Portuguesa (CMJPLOP) iha Brasil prezide hosi hosi Presidente da República Federativa do Brasil, Sr. Torquato Lorena.

XV Conferência dos Ministros da Justiça dos Países de Língua Oficial Portuguesa nu’udar eventu ás líder Ministériu Justisa sira atu troka informasaun no esperiénsia ba malun, aliénde ne’e, halo mós kooperasaun bilateral no multilateral ba dezenvolvimentu justisa iha idak-idak nia nasaun. Konferénsia nível ministru justisa ida ne’e involve Ministro da Justiça do Timor-Leste, Ivo Valente; Secretária de Estado para a Justiça de Angola, Maria Isabel Tormenta; Ministra da Justiça e Trabalho de Cabo Verde, Janine Lélis; Ministro da Justiça de Guiné Bissau, Rui Sanha; Embaixador de Moçambique no Brasil, Manuel Lupise; Embaixador de Portugal no Brasil, Jorge Cabral; Ministra da Justiça, Administração Pública e Direitos Humanos de São Tomé e Príncipe, Ilza Amado Vaz.

Ministru Justisa Timor-Leste, Ivo Valente kualidade hanesan Prezidente CMJPLOP iha nia diskursu abertura partilha nia-agradesimentu ba Governu República Federativa Brasil nian ne’ebé mak fó ona apoiu hodi realiza konferénsia ás ministru justisa sira iha ámbitu paíz sira Língua Oficial Portuguesa. Aliénde ne’e, nia mós hato’o boas-vindas ba líder justisa paíz sira ne’ebé foti prezensa iha fórum privileju CMJPLOP nian iha domíniu justisa, no direitu. Nia hateten mós katak, esforsu lubun hala’o tiha ona bainhira lídera CMJPLOP hosi atribuisaun presidensia iha 2015 iha Díli hodi visibiliza meius kooperasaun no promusaun iha área justisa paíz lingua portuguesa.

“Planu servisu konferénsia ministru justisa sira iha área dezenvolvimentu organizasionál ambranje ona ho adesaun membru-ida, Guiné Equatorial sai hanesan espasu luan ba nasaun CPLP sira hodi halo kooperasaun únika iha área justisa atu kontribui ba dezenvolvimentu Estadu Direitu, demokrasia no direitus umanos,” dehan Prezidente CMJPLOP Ivo Valente.

Prezidente Ivo Valente mós aprezenta relatóriu kona-ba esforsu sira ne’ebé hala’o ona hosi Comissões Trabalho da Conferência no Grupo Técnico iha ámbitu promusaun no protesaun ba direitu terras no propriedades, servisu prisionais nian, protesaun labarik, kombate tráfiku seres umanos no kombate korrupsaun. Prezidente Ivo Valente mós informa kona-ba timorense nia lideransa ba presidensia CMJPLOP ne’ebé visibiliza kooperasaun ho fórum organizasaun internasionál sira seluk mak hanesan OCDE, COIMJIB (paíz lingua espanól), ASEAN iha ámbitu kooperasaun di’ak área justisa nian.

Presidente da República Federativa do Brasil, Sr. Torquato Lorena iha serimónia abertura XV Conferência dos Ministros da Justiça dos Países de Língua Oficial Portuguesa partilha nia-agresimentu no orgullu tanba bele hasoru ministru justisa sira páiz CMJPLOP sira iha Brasília ne’ebé mak hakesi ona interese hamutuk hodi servisu efetivu no nakonu esperítu fraternidade paíz sira lingua portuguesa nian. Nia mós informa kona-ba reuniaun CMJPLOP balun iha Mozambique no Brazil ho presidente Paíz CMJPLOP sira.

“Brazil orgullu no honradu simu Prezidensia CMJPLOP nian, reuniaun ne’e importante hodi reforsa administrasaun justisa iha nasaun idak-idak nian, hamutuk hodi kombate tráfiku seres umanos no kontinua kampaña Coração Ázul ONU ne’ebé mak ita-hotu preokupa,” dehan Presidente do Brasil Torquato Lorena.

Presidente da República Federativa do Brasil Torquato Lorena mós fó-nia agredisementu ba Ministru Justisa Timor-Leste Ivo Valente ne’ebé halo transferénsia presidensia konferénsia ba Brazil no enkoraja Prezidente CMJPLOP foun (Brazil) atu kontinua servisu maka’as loron ba loron.

Iha Conferência dos Ministros da Justiça ida ne’e, hala’o mós diskusaun durante loron-tolu hodi halo revizaun ba protókolu adisionál nian em relasaun ho estabelese rejimentu Konferénsia Ministru Justisa sira, asina Planu Trabalho Brasília kona-ba Propreidade da Terra como Fator de desemvolvimento, adesaun ba Coração Ázul ONU, estabelese ponto focais, no seluk-seluk tán.

Akompaña Ministru Justisa Ivo Valente iha reuniaun tékniku no konferénsia ne’ebé hala’o hosi loron 26-29 Juñu 2017 iha Kapitál Brazil, Brasília ne’e mak hanesan tuir mai; Diretór-Jeral Ministériu Justisa Henrique de Oliveira Ximenes, Diretór DNAF Crisogno da Costa Neto, Diretór DNAJL Nelinho Vital, Diretór DNTPSC Romão Guterres, Diretór DNSPRS Helder Cosme Marçal Belo, Xéfi Departementu DNAJL Cidália da Crus, Metodio Guimarães, Assessora Jurídiku DANJL Patrícia da Silva Coutinho, Diretora Ezekutivu UIF Banco Central Maria José Sarmento no Assessor Komunikasaun Sosiál Ministru Justisa Joaozito Viana.

Maria de Lourdes Xavier Lin
Media Officer
Gabinete Ministru Justisa