MINISTRU IVO VALENTE HALO DESPEDIDA BA MEMBRU FOUN PSIK NE’EBÉ MAK SEI TUIR FORMASAUN IHA PORTUGÁL

Versão para impressão

DÍLI, PSIK – S.E. Ministru Justisa, Ivo Valente halo despedida ba membru foun Polísia Sientífiku Investigasaun Kriminál (PSIK) hamutuk ema nain 30 ne’ebé mak sei ba tuir formasaun durante fulan-hitu iha Portugál iha Aula Reuniaun PSIK Caicoli, Díli, loron Kinta-Feira (02/02/2017).

Formasaun Polísia Sientífiku Timor-Leste ne’ebé mak sei halo iha Sentru Formasaun Polísia Judisiáriu Portugál, hanesan pakóte integradu ba preparasaun membru foun PSIK antes hala’o sira-nia kna’ar nu’udar investigadór polísia sientífiku.

Iha nia-liafuan despedida, Ministru Ivo Valente hateten, ita-bót sira escolhido hosi ema barak ne’ebé hakarak atu sai Polísia Sientífiku Investigasaun Kriminál, ne’e atu dehan katak imi melhor no sorti di’ak liu ema seluk. Tanba-ne’e, aproveita didi’ak oportunidade ida ne’e hodi aprende, aumenta imi-nia kapasidade atu nune’e kontribui di’ak liután iha servisu investigasaun krimi komplexu sira.

“PSIK maske instituisaun foun, komesa hatudu nia progresu dadaun, ita kompleta dadaun fasilidades no laboratóriu, no rekursu umanus. Rekursu umanus em termos kualidade iha investigasaun importante atu kombate krimi organizadu no komplexu sira. Atu iha kualidade, imi tenke aprende beibeik no hasa’e kapasidade tuir kresimentu krimi ne’ebé Timor-Leste hasoru dadaun agora no iha futuru oin mai, ” dehan Ministru Ivo Valente.

Aliénde ne’e, Ministru Ivo Valente husu ba formadu membru foun PSIK atu hatudu komportamentu di’ak, disiplina durante iha formasaun tanba hanesan Timor-oan reprezenta Estadu iha ema-nia rain. “Kuida án iha hahalok tanba reprezenta Estadu no ita-nia povu, hanesan Timor-oan tenke apoiu malu, tenke humilde nune’e aprende siénsia no lori mai matenek hirak ne’e hodi dezenvolve ita-nia instituisaun no rai doben Timor-Leste,” expressa Ministru Ivo Valente.

Despedida remata ho liafuan korajem hosi Ministru Justisa Ivo Valente katak, fulan-hitu mai ne’e membru PSIK sei iha rekursu umanus aumenta di’ak, sufisiente, signifika sei fó mós espetasaun públiku ba dezenvolvimentu Polísia Sientífika iha futuru.

“Hanesan responsável polítiku, aliénde rekursu umanus tenke sufisiente, ita halo esforsu dadaun hodi kompleta infra-estrutura sira, Governu halo ona planu hodi hari’i edifísiu própiu ba PSIK nian,” dehan Ministru Ivo Valente.

Marka prezensa iha serimónia despedida ba membru foun PSIK hodi tuir formasaun iha Portugál mak; Diretór-Ajunto PSIK Adino Nunes Cabral, Xéfi Gabinete Ministru Justisa Evangelino Belo, Xéfi Departementu sira iha ámbitu PSIK no Assessor Gabinete Ministru Justisa Joaozito Viana.


Maria de Lourdes Xavier Lin
Media Officer
Gabinete Ministru Justisa