MINISTRU IVO VALENTE ENTREGA SERTIFIKADU NASIONALIDADE BA SIDADAUN ESTRANJEIRU IHA DÍLI

Versão para impressão

DÍLI, DNRN – S.E. Ministru Justisa, Ivo Valente liu hosi Diresaun Nasionál Rejistu Notariadu (DNRN) fó sertifikadu nasionalidade ba sidadaun estranjeiru sira hamutuk ema nain 69 atu sai sidadaun Timorense tuir pré-requisito do casamento e naturalização iha Sala Reuniaun DNRN, Mandarin Díli, loron Segunda-Feira (30/01/2017).

Ema nain 69 ne’ebé simu nasionalidade mai hosi nasaun oi-oin mak hanesan; Austrália, Portugál, China, Filipina, Brazil, Indonésia no seluk-seluk tán. Sidadaun ne’ebé barak-liu mak sai sidadaun Timorense maioria hosi paíz Indonésia.

Iha serimónia entrega serfifikadu ne’e, Ministru Ivo Valente felisita reseptór sertifikadu sidadania nian, no enkoraja atu sai sidadaun ida ne’ebé di’ak ba dezenvolvimentu ita-nia rain, hanesan mós uluk sira sei hanesan sidadaun ida iha sira-nia paíz anteriór. Ministru mós fó nia apresiasaun no agradesimentu ba ekipa selesaun no ijame sidadania hosi Ministériu Justisa (DNRN) no Inspetór-Jerál Ministériu Edukasaun nian ne’ebé konklui ona prosesu selesaun no ijame.

“Sai ona sidadaun Timor, ita-bót sira iha direitu hanesan mós ho Timor-oan sira seluk, maske nune’e, hanesan dever sidadaun idak-idak nian atu obedese ba lei no regulamentu ne’ebé mak Timor-Leste hatu’ur ona,” hateten Ministru Ivo Valente.

Ministru Ivo Valente dehan liután, “sidadaun hotu-hotu, inklui ita-bót sira ne’ebé hola ona parte sai sidadaun Timor tenke kontribui páz no dezenvolve ita-nia rai doben ida ne’e, ne’e mak dever ita-hotu nian.”

Iha oportunidade ida ne’e, Ministru Ivo Valente mós esplika kona-ba direitu sidadaun nian hodi nain ba rai, direitu atu sai funsionáriu públiku, sira-nia sirkulasaun, hari’i páz no estabilidade, inklui ema-hotu nia papel ba dezenvolvimentu nasionál.

Serimónia ne’ebé hetan partisipasaun hosi Embaixadór Indonésia iha Timor-Leste, Sr. Adrianus Hendrasmoro, no família reseptór sertifikadu sidadania nian ne’e hahú ho kanta Hino Nasionál “Patria! Patria!” hafoin rona relatóriu ijame no selesaun ne’ebé hala’o ona hosi ekipa ne’ebé kompostu hosi Diresaun Nasionál Registu Notariadu (DNRN) em kolaborasaun ho Ministériu Edukasaun.

Diretór DNRN Sr. Vitór da Costa Neto iha nia-relatóriu aprezenta kona-ba proposta barak ne’ebé hosi sidadaun estranjeiru atu sai sidadaun Timor-Leste, no nia esplika mós kona-ba prosesu selesaun no ijame atu sai sidadaun Timorense. Nia mós haktuir tán katak, ema hamutuk 69 ne’e, tuir ona ijame orál no eskrita kona-ba koñesimentu iha área lingua, históira no kultura Timor-Leste nian. Nune’e, sira ne’ebé liu ona, tuir prosesu naruk ida bainhira atu sai Timor-oan, maske sira kaben ho Timor-oan, e mós prosesu por naturalização nian.

Partisipa serimónia entrega sertifikadu nasionalidade ne’e, Embaixadór Indonésia iha Timor-Leste Adrianus Hendrasmoro, Sekretáriu Estadu Terras Propriedades Jaime Xavier Lopes, Diretór-Jerál Ministériu Justisa Henrique de Oliveira Ximenes, Diretór DNRN Vitór da Costa Neto, Inspetór-Jerál Ministériu Edukasaun, Inspetór-Jerál Lucas António da Costa, Sub-Inpetór Jaime Maia no António de Fatíma, Xéfi Gabinete Ministru Justisa Evangelino Belo, dirijente notáriu sira no diretoris iha ámbitu rejistu notáriu no konservatóriu munisípiu sira-hotu.

Maria de Lourdes Xavier Lin
Media Officer
Gabinete Ministru Justisa