MINISTRU IVO VALENTE PREZIDE REUNIAUN KONSELLU JERÁL CENTRO DE FORMAÇÃO JURÍDICA E JUDICIÁRIO IHA DÍLI

Versão para impressão

DÍLI, CFJJ – S.E. Ministru Justisa, Ivo Valente ho kualidade hanesan Prezidente Konsellu Jerál prezide reuniaun Konsellu Jerál Centro de Formação Jurídica e Judiciário (CFJJ) ne’ebé partisipa hosi Prezidente Supremu Tribunál Justisa, Prokuradór-Jerál Repúblika, Defensór Públiku-Jerál, Prezidente Konsellu Jestaun no Disiplina Advokasia no Diretora CFJJ iha Sala Reuniaun CFJJ, Caicoli, Díli iha loron Kinta-Feira (26/01/2017).

Primeiru-reunião iha tinan 2017 ne’e ho ajenda atu rona no fó apresiasaun ba relatóriu ezekusaun programa formasaun nian ne’ebé hala’o ona tinan 2016. Aliénde ne’e, diskute no halo aprovasaun ba Planu Asaun Anuál ba formasaun iha tinan 2017, no prosesu rekrutamentu ba formadór majistradu internasionál sira hosi Estadu-membru CPLP hodi fó apoiu ba Centro de Formação Jurídica e Judiciária, no mós seluk-seluk tán.

Iha reuniaun ne’e, Ministru Ivo Valente fó-nia agradesimentu ba prezensa membru konseleiru sira, tanba reuniaun ne’e sei ko’alia futuru formasaun ba majistradu nian, hare’e mós kestaun formadu sira depois-de sai hosi Centro de Formação Jurídica hodi asume responsabilidade iha nia kna’ar nu’udar juíz, prokuradór, defensór no advogadu.

“Importante atu ko’alia no diskute kualidade iha atendimentu justisa nian, diskute mós estratéjia hodi produz majistradu iha futuru hodi haktuir no hakonu expetasaun públiku buka lialos no justisa,” hateten Ministru Ivo Valente.

Hafoin introdusaun hosi Ministru Ivo Valente, aprezentasaun relatóriu no Planu Asaun 2017 halo hosi Diretora CFJJ Dra. Marcelina Tilman da Silva, no kontinua hetan apresiasaun hosi Prezidente Konsellu Jerál no membru konseleiru sira seluk. Hafoin ne’e, relatóriu no planu lori ba aprovasaun, kontinua ho ajenda seluk.

Reuniaun kuaze oras-rua iha Centro de Formação Jurídica la’o di’ak tebes iha ambitu rona malu, argumentativu iha diskusaun nia laran, aprezenta solusaun no estratéjia iha asaun melhoramentu ba formasaun iha futuru hodi produz majistradu ne’ebé iha integridade, inovativu no kapabél.

Ministru Ivo Valente hodi taka reuniaun ne’e hateten, “formasaun iha futuru tenke rígor liután, nune’e formadu ne’ebé kualifikadu mak sei bele passa, tanba Centro de Formação Jurídica iha nia prosesu formasaun foku liu ba kualidade formadu laós de’it númeru majistradu ne’ebé mak ita atu forma.”

Reuniaun remata ho konkluzaun katak, sénu kazu iha prosesu formasaun mak Centro de Formação Jurídica la hetan majistradu di’ak em termos kualidade, ita bele loke tán formasaun ba majistradu foun iha tempu oin mai.

Marka prezensa iha reuniaun ne’e mak membru konseleiru sira mak hanesan; Juíz Konseleiru Tribunal Rekursu (TR) Dr. Deolindo dos Santos, Procurador-Geral da República Dr. José da Costa Ximenes, Defensór Público Geral Dr. Sergio Hornai, Presidente Presidente Conselho do Gestão e Disciplina da Advocacia Dr. Nelinho Vital no Directora do CFJJ Dra. Marcelina Tilman da Silva.

Maria de Lourdes Xavier Lin
Media Officer
Gabinete Ministru Justisa