FORMASAUN CONTROL SELF ASSESSMENT (CSA) BÁ JESTOR NO AUDITOR MINISTÉRIU JUSTISA NIAN.

Versão para impressão

Jakarta, Indonesia – Gabinete Inspesaun no Auditoria (GIA) Ministériu Justisa (MJ) partisipa iha programa formasaun kona-bá “Processu Auditoria Internu no Control Self Assessment (CSA)” iha Yayasan Pendidikan Internal Audit (YPIA) Jakarta.
Diretúr Akademia YPIA nian Senhor Igor Manindjo, Ak., MCom (Hons) iha nia apresentasaun dahuluk akresenta katak Matéria formasaun ne’e importante tebes oinsa Auditor no Jestor sira bele iha kueñesementu atu kumpriende didiak lalaok servisu no responsabilidade Jestor sira iha ida-idak nia servisu fatin, aumensmo tempo identifika problema, Risku no Mitigasaun hodi prepara solusaun ne’ebé adekuadu hodi resolve problemas e risku sira atu nune’e diresaun sira bele asegura efisisensia no efikasia iha prestasaun servisus públiku.

Iha sesaun primeira partisipantes sira aprende kona-bá oinsa prepara mapa lalaok servisu nian (business process mapping) iha diresaun nia laran no iha business process mapping ne’e mos entidades sira difini mos Matrix Distribuisaun Responsabilidade (Responsibility Assignment Matrix) atu nune’e ema ida-idak hatene ona sira nia responsabilidade iha kada atividades sira no kada atividades sira utiliza ema nain hira no tempo hira atu remata.
Iha sesaun segundo partisipantes aprende kona-bá konseitu Control Self Assessment no oinsa partisipantes sira prepara Matrix Risku no Kontrolu (MRK) hanesan pratika ida bá partisipantes sira atu implementa Control Self Assessment bá aktividades sira iha kada instituisaun hodi identifika inherent risk no Residual Risk no ikus mai bele difini kedan solusaun ka mitigasaun bá problema sira ne’ebé akontese iha passadu no stratejia atu hamenus risku ne’ebé bele akontese iha futuru mai.

Inspetúr Jeral Ministériu Justisa nian Dr. Lucas Antonio da Costa depois remata tiha formasaun ne’e informa katak GIA mak hanesan nain bá programa formasaun ne’e, no iha formasaun ne’e GIA hakarak involve mos jestor sira (Diretores no Chefe departamentos) atu nune’e jestor sira iha kuñesementu ne’ebé klean hó hanoin ida katak depois fila hosi formasaun ne’e iha futuru mai bele habelar tan matenek ne’e bá funsionáriu sira ne’ebé la partisipa no aumesmu tempo diretúr sira bele prepara rasik sira Standard Operating Procedure (SOP) hó akompanhamento GIA nian, liu-liu bá área servisu atendementu públiku nian hanesan Arendamentu Uma no Rai Estado iha DNTPSC, atendementu Bilhete Identidade, Passaporte no passe fronteirano no dokumentus ofisial sira seluk ne’ebé implementasaun iha DNRN tuir dalan ne’ebé efisiensia no efikaz.
Formasaun ne’e fahe bá ekipa 2 (rua), Ekipa primeira hahú formasaun iha dia 9 to’o 15 fulan Outubro tinan 2016 no ekipa segundo hahú iha 16 to’o 22 fulan Outubro tinan 2016.

Ekipa Primeira lidera husi Inspetor Jeral Ministériu Justisa nian Sr. Lucas Antonio da Costa, hó nia membro sira mak hanesan Diretúr DNTPSC Sr. Romão Guterres, Xefi Gabinete Dr. Evangelino Belo, Diretúr DTPSC Muinicípiu Aileu Sr. Gaspar de Sa Benevides, Director DTPSC Municípiu Covalima Sr. Antonio Carceres Soares, Xefe Departementu TI Sr. Inocencio Alves, Xefe Departamento Inspesaun no Investigasaun Sra. Juliana Fátima Gama, no senhor Gaspar Araujo téknik professional husi GIA.
Ekipa Segundo lidera husi Sub-Inspetor Ministériu Justisa nian Sr. Jaime Maia, hó nia membro sira mak hanesan Diretúr Rejistu Sivil Municípu Baucau Sr. Virgilio Pereira, Xefe departamento Fiskalizasaun no Auditoria Sr. Elvio Soriano, Xefe Departamento Administrasaun finansas DNRN Sr. Amandio Alves, Xefe Departamento Formasaun no Penitenciaria Sr. Cristiano Salsinha, Xefe departamento Passaporte no passé Fronteira Sra. Suzana Petronela Fernandes, Sr. Honorio Magalhães núdar téknik superior DNAJL no Sra. Jacinta Pereira Téknik profesional husi GIA.

Prepara husi
Juliana Fátima Gama
Xefe Dep. Inspeksaun no Investigasaun-GIA