Sr.Bastonário bá Ordem Advogadu sira nian husi Portugal Vizita Ministériu Justisa

Dr.António Marinho e Pinto, núdar Bastonário bá Ordem Advogadu sira nian husi Portugal hala’o nia vizita kortezia bá Ministra Justisa Timor-Leste nian hodi ko’alia kona-ba Ordem Advogadu sira nian husi Portugál.

Iha visita kortezia ne’e, Sr. Bastonário simu husi Diretór Jerál Ministériu Justisa, Francisco Cárceres inklui mós Asesór Ministra. Iha biban nia laran, Ministra Justisa, Lúcia Lobato hateten, Sr. Bastonário bá Ordem Advogadu sira nian husi Portugal hala’o nia vizita ofisiál mai Timór-Leste ne’e, tamba nia hatán pozitivamente duni konvite ne’ebé mak antes ne’e Ministra Lúcia entrega ba nia.

Ministra hateten, ida ne’e hanesan kria parseria entre Governu Timór-Leste ho Ordem Advogadu sira nian husi Portugál, tamba tuir lei, oras ne’e dadaun ita nia Governu prepara hela grupo ba advogadu privadu sira ne’ebé atu remata ona sira nia formasaun profisional husi Sentru Formasaun Jurídika.

Tuir Ministra, ordem Advogadu sira ne’e tenki hamosu husi lei, mandatu lei advokasia ne’ebé oras ne’e vigora ona, fó kompetensia ba Governu liu husi Ministériu Justisa, hodi hahuu prepara harii orgaun advogadu independente Timór-Leste nian. Tamba ne’e Ministériu tenki iha nia parseiru tékniku ida atu oinsa mak bele hala’o programa ne’e.


Portugal, tuir Ministra Lúcia, sei apoia dala ida tan TL atu prepara ita nia advogadu privadu sira, ho ida ne’e iha tempu badak ha’u fiar sei hamosu ordem advogadu TL nian. Lori TL nia naran ha’u mós hakarak hato’o agradese ba prezidente ba orden advogadu Portugal nian ne’ebé hiitan to’o mai iha TL hodi hanoin lisuk oinsa mak TL bele kria ordem advogadu iha futuru.

Portugál fó deit sira nia apoiu tékniku, enquantu fundu despeza sira mai husi Governu TL mak prepara rásik, tamba oras ne’e Portugál nia ekonomia ladun la’o ho di’ak. Portugal hasoru krize ekonomika. Ho ida ne’e tekniku sira mai husi ordem advogadu Portugál nian.

Portugál tuir Ministra Lúcia, katak oras ne’e dadaun sira iha ona advogadu besik rihun 50 resin. Ho ida ne’e relatoriu sira nian mós iha rihun ba rihun. Nune’e ita mós husu atu oinsa sira bele kapasita ita nia advogadu Timor-oan sira.

Maske osan mai husi ita nia Governu rásik, maibe oinsa atu bele prepara ita nia advogadu sira iha futuru ho di’ak liutan liu husi esperiensia ne’ebé tekniku sira husi ordem advogadu portugál nian sei fahe.

Advogadu privadu sira TL nian, iha knár importante tebes atu oinsa sira bele fó apoiu ba sidadaun sira ne’ebé mak hakarak buka justisa to’o iha Tribunál. Ita hotu hatene katak bainhira laiha advogadu, Tribunál mós sei la la’o.

Oras ne’e ita hotu hó laran haksolok haré ita nia advogadu husi primeiru grupo nebe la kleur-tan sei hotu sira nia formasaun iha Sentru Formasaun Jurídika.

Molok atu remata nia visita kortezia ne’e, Ministra Justisa, Dra.Lúcia Lobato entrega mós lembransa uma-lisan Timór-Leste nian ba Dr.António Marinho e Pinto.

Sr. Bastonário bá Ordem Advogadu sira nian husi Portugal ne’e hala’o nia vizita ofisiál iha Timór-Leste hahu husi Tersa-feira, 27 to’o Sesta-feira, 30 fulan-Setembru 2011.