DÍLI, MJ – S.E. Ministru Justisa Ivo Valente asina kontratu arendamentu propriedade Estadu nian ho empreza investidór Timor-oan Sr. Rogério Tiago de Fátima Lobato no Sra. Layin Nisa Alkatiri iha Aula Reuniaun Ministériu Justisa, Díli, loron Sexta-Feira (26/08/2016).

Kompañia ivestidór Sosiedade Comercial de The Lodge Hotel, Unip., Lda. ne’e reprezenta hosi Sr. Rogério Tiago de Fátima Lobato ho propriedade objetu ba arendamentu ho tipu terrenu no edifísiu permanente iha área rai hamutuk 41,981metru kuadradu iha Aldeia 30 de Agusto, Suku Comoro hodi halo konstrusaun Hotel foun, restaurante, apartementu, no alojamentu habitasaun.

Enkuantu investidora Sra. Layin Nisa Alkatiri reprezenta Sosiedade Comercial de L&O Unip., Lda. arenda propriedade ho tipu terrenu no edifísiu permanente tolu iha iha área rai hamutuk 3,730 metru kuadradu iha Aldeia Ucu-Bemacu, Suku Beloi, Postu Administrativu Atauro hodi uza edifísiu Pousada no halo konstrusaun foun Hotel, restaurante no alojamentu sira seluk.

Hafoin asina kontratu arendamentu, Ministru Ivo Valente hateten katak, Ministériu Justisa agradese tebes ba emprezáriu Timor-oan sira ne’ebé iha interese atu halo arendamentu propriedade Estadu nian ba investimentu bót sira. Investimentu ida ne’e nu’udar asaun konkretu setór privadu nian atu ajuda Governu hodi dezenvolve di’ak liután ita-nia rai, no importante mak fornese kampu traballu ba ita-nia joven sira.

“Inisiativa hodi halo investimentu sei enkoraja setór privadu Timor-oan sira seluk, aliénde, atu ajuda ita-nia Governu hodi reduz dezempregu, sei estimula mós atividade ekonomia iha ita-nia rai laran. Tanba-ne’e, ha’u agradese tebes ba kooperasaun no kolaborasaun di’ak entre investidór sira ho Governu,” dehan Ministru Ivo Valente.

Marka prezensa iha asina kontratu arendamentu mak; Diretór-Jeral Ministériu Justisa Henrique de Oliveira Ximenes, Diretór DNTPSC Romão Guterres, Inspetór Gabinete Inspesaun no Auditorial (GIA) Lucas António da Costa, Sub-Inspetór GIA Jaime Maia, Sub-Inspetór GIA Antonia Fatima, Xéfi Gabinete Ministru Justisa Evangelino Belo, Assessor Ministru Justisa Joaozito Viana no Mídia Nasionál sira.