DÍLI, MF – S.E. Ministru Justisa Ivo Vatente halo aprezentasaun Proposta Orsamentu Ministériu Justisa nian ba Tinan Sívil 2017 iha reuniaun Komité Revizaun Polítika Orsamentu (CROP) ne’ebé mak prezide hosi S.E. Primeiru-Ministru RDTL, Dr. Rui Maria de Araújo ho kualidade hanesan mós Prezidente CROP iha Sala Reuniaun Ministériu Finansas, Díli, loron Kuarta-Feira (24/08/2016).

Aprezentasaun proposta orsamentu Ministériu Justisa nian ba tinan 2017 iha reuniaun membru CROP ne’e, atu hato’o informasaun kona-ba planu Ministériu Justisa nian no haklean liután diskusaun em relasaun ho atribuisaun pakóte fiskál 2017. Aliénde ne’e, halo ezersísiu ba balansu orsamentu 2016 hodi responde atividade balun ne’ebé mak planeia ona iha 2017, no fundamenta proposta planu adisionál Ministériu Justisa nian.

Primeiru-Ministru Rui Maria de Araújo iha ninia introdusaun reuniaun esplika kona-ba tetu orsamentu tinan 2017 nian ne’ebé limite maximu $1,2 mil milhões dólares norte-americanos. Sei laiha pedidu ba adisionál ruma, maske nune’e, nia husu ba Ministru Justisa atu aprezenta prioridades planu adisionál no aprezenta nia fundamentu sira, molok membru CROP foti desizaun.

Iha ninia esplikasaun, Ministru Ivo Valente aprezenta pakóte fiskál 2017 hamutuk $16,296 mil dólares ne’ebé atribui ba iha Ministériu Justisa. Pakóte fiskál 2016 fahe ba kategoria despeza saláriu no vensimentu hamutuk $3,296 mil dólares no bens servisus hamutuk $13,000 mil dólares.

“Proposta ida ne’e reflete orientasaun no desizaun Konsellu Ministru nian, katak, Planu Asaun Anuál 2017 tenke kontinua programa 2016 nian bainhira Ministériu Justisa define prioridade sira,” esplika Ministru Ivo Valente.

Ministru Ivo Valente salienta liután katak, “bazeia ba tetu pakóte fiskál ne’ebé atribui ba iha Ministériu Justisa, internalmente, ami halo ona diskusaun beibeik iha reuniaun Konsellu Konsultivu hodi maneja orsamentu ida ne’e, maibé sei hasoru nafatin difikuldade. Tanba-ne’e, ha’u lori proposta adisionál ida ne’e hodi informa ba Komité Revizaun Orsamentu atu tetu no foti desizaun, inklui mós aprezenta justifikasaun no fundamenta planu prioridade hirak ne’e.”

Proposta adisionál Ministériu Justisa ne’ebé mak aprezenta iha reuniaun CROP mak; kestaun rekrutamentu Guarda Prizionál ba Prizaun Suai, inklui implementasaun rejime espesiál ba Guarda Prizionál sira. Aliénde ne’e, proposta adisionál ba funsionamentu rejime Centro Formação Jurídica, Defensoria Públiku Jerál no produsaun passaporte ne’ebé propoin hosi Diresaun Nasionál Rejistu Notariadu (DNRN).

Hafoin ne’e, Prezidente CROP, átual Primeiru-Ministru Rui Maria de Araújo hatudu meius solusaun liu hosi jestaun orsamentu ministériu nian. Tempu mak hanesan, nia husu perguntas maiz kritiku, relativamente ho progressu ezekusaun orsamentu tinan 2016 ba Ministériu Justisa tuir númeru ezekusaun iha Portal Transparénsia. Sá progressu mak Ministériu Justisa atinzi, oinsá ministériu kompremete atu ezekuta tuir kalendáriu ezekusaun nian. Nune’e mós, nia husu esplikasaun detailla kona-ba rubrika sira iha kategoria bens servisus nian no posibilidade ezekusaun no halo tranferénsia.

Marka prezensa iha reuniaun CROP mak: Ministru Estadu, Koordenadór Asuntu Administrasaun Estadu no Justisa nian no Ministru Administrasaun Estatál Dionísio Babo Soares P.hD.; Ministru Estadu, Koordenadór Asuntu Sosiál no Ministru Edukasaun António da Conceição, Ministru Estadu, Koordenadór Asuntu Ekonómiku no Ministru Agrikultura no Peska Estanislau da Silva, Ministru Obras Públika, Transportes no Komunikasaun Gastão de Sousa, Vise-Ministru Finansas Hélder Lopes, Sekretária Estadu ba Apoiu no Promosaun Sósiu-Ekonómika ba Feto Veneranda Lemos Martins, no Sekretáriu Estadu Komunikasaun Sosiál Nélio Isaac Sarmento.

Akompaña Ministru Ivo Valente iha reuniaun ne’e mak; Sekretáriu Estadu Terras no Propriedades Jaime Xavier Lopes, Diretór-Jerál Henrique de Oliveira Ximenes, Defensór Públiku-Jerál Sergio de Jesus Hornai, Diretór PSIK Vicente Fernandes e Brito, Diretora CFJ Marcelina Tilman da Silva, Inspetór-Jerál GIA Lucas António da Costa, Diretór DNAF Crisogno da Costa Neto, diretores no ekipa tékniku sira hosi Ministériu Justisa.