MAUBARA, LIQUIÇA – S.E. Ministru Justisa Ivo Valente halo Lansamentu Rejistu Moris ba Kosok Oan sira tinan 0 – 5 ba Munisípiu Liquiça no Bobonaro iha ámbitu kooperasaun entre Child Fund Timor-Leste (CFTL) ho Governu RDTL liu hosi Diresaun Nasionál Rejistu Notariadu (DNRN) Ministériu Justisa iha Centro Treinamento de Agricultura OISCA Timor Lorosa’e, iha Postu Administrativu Maubara, Liquiça, loron Sexta-Feira (17/06/2016).

Iha ninia intervensaun ba lansamentu, Ministru Ivo Valente hato’o nia agradesimentu ba Child Fund Timor-Leste ba alargamentu servisu Rejistu Kosok Oan nian ba Povu Munisípiu Liquiça no Bobonaro.

“Governu, Ministériu Justisa hakarak hato’o agradese bót no obrigadu barak ba apoiu Child Fund Timor-Leste, nune’e alarga tán funsionamentu servisu rejistu labarik nian to’o iha munisípiu idak-idak, ne’e atu lori besik liután rejistu ba labarik sira ne’ebé moris ona, no sei moris tán iha Munisípiu Liquiça no Bobonaro,” hateten Ministru Ivo Valente.

Ministru Ivo ko’alia mós kona-ba importánsia hosi rejistu labarik, em relasaun ho fornesimentu dadus estatistika nian ba polítika públiku, dezenvolvimentu edukasaun, saúde no seluk-seluk tán. Aliénde ne’e, nia mós ko’alia kona-ba obrigasaun Governu atu rejista labarik hotu-hotu, identifikasaun nia ema, no fó identidade própiu ba labarik sira mak moris iha Timor-Leste.

“Estadu iha obrigasaun atu fasilita rejistu labarik, aliénde atu garante labarik nia nasionalidade no hatene otas labarik sira nia antes tama eskola, importante mós fornese dadus estatistiku ba Governu hodi halo planeamentu polítika públiku ba servisu sosiál no saúde,” esplika Ministru Ivo Valente.

Diretora CFTL Bernice C. Roldan, iha fatin hanesan fó nia intervensaun katak, rejistu moris kosok oan hanesan prosesu ofisiál rekoñesimentu hosi Estadu RDTL no estatutu legál ba sidadaun sira ne’ebé mak moris iha Timor-Leste.

“Tanba-ne’e, presiza atu haforsa sistema rejistu ba labarik sira no ne’e presiza hetan motivasaun forte hosi Xéfi Suku sira no autoridade lokál hotu,“ dehan Diretora Bernice.

Nia mós esplika kona-ba Child Fund Internasionál nia papel ba infantil, katak jovens hanesan sentru ba servisu CFTL nian hodi asegura ba moris naruk, dezenvolve líder iha futuru, esforsu ba servisu bens estar labarik sira, no promove protesaun labarik iha Timor-Leste.

Iha sorin seluk, Administradór Munisípiu Liquiça no Bobonaro hato’o mós nia agradesimentu ba Ministériu Justisa no Child Fund, tanba lansa ona rejistu kosok oan iha sira-nia munisípiu. Sira deklara atu hamutuk ho administradór postu no xéfi suku, no autoridade lokál sira hodi koopera, organiza no mobiliza povu hotu-hotu hodi rejistu sira nia oan.

Hafoin lansamentu, Ministru Ivo Valente no Komisária Direitu Labarik (KDL) Maria Barreto halo dialógu ho labarik sira, nune’e mós anima labarik sira kanta no tebe-tebe hamutuk.

Lansamentu Rejistu Moris ba Munisípiu Liquiça no Bobonaro partisipa hosi Diretór Nasionál CFTL Sra. Bernice C. Roldan, Administradór Liquiça Sr. Domingos da Conceição dos Santos, Administradór Bobonaro Zeferino Soares dos Santos, Komisária Direitu Labarik Maria Barreto, Diretór-Jerál Ministériu Justisa Henrique Ximenes de Oliveira, Diretór DNRN Vitór da Costa Neto, Inspetór-Jerál Sr. Lucas António da Costa, Komandante PNTL Munisípiu Liquiça, Diretór Konservadór Munisípiu Bobonaro Sr. João Maupelo da Costa, Diretór Konservadór Munisípiu Liquiça José Sousa dos Reis, Administradór Postu sira, Xéfi Suku sira, ofisiál nasionál no munisípiu, funsionáriu Child Fund, inan-aman kosok oan, labarik sira, mídia nasionál no mídia lokál sira.