Ho tempu ne’ebé limitadu tebes durante estadia ofisial iha Lisboa, Portugal, Sr. Ministro da Justiça, Dr. Dionísio Babo hala’o mos sorumutu ida ho Dr. Marinho E Pinto, Bastonário da Ordem dos Advogados Portugal (OAP) durante horas 1 nia laran iha tempu han meudia nian.
Durante sorumutu ne’e, koalia liu konaba kooperasaun entre MJ ho OAP iha futuru mai hanesan parte ida ba kontinuasaun husi protokolu kooperasaun ne’ebé estabelese iha tinan 2011 liu ba, hanesan atu hare posibilidade ba Timor Leste atu haruka tan formandos advogados sira atu mai halo estajiu ou estudu komparativu ho OAP nian.

Pontu importante ne’ebé sai hanesan pontu diskusaun durante sorumutu nian maka oin nusa OAP bele fó ajuda ba Conselho Gestão e Disciplina da Advocacia (CGDA) Timor Leste nian atu servisu ba establese Ordem de Advogados Timor Leste nian. Hanesan ita hotu hatene katak, to’o ohin loron Ordem Advogados Timor Leste seidauk iha ho nune’e servisu Ordem nian sei hala’o husi CGDA. Conselho ne’e rasik kompostu husi konseilheru nain 5, ne’ebé preside husi Dr. Nelinho Vital, hanesan presidente CGDA.

Iha sorumutu ne’e, Presidente CGDA, Dr. Nelinho, aprezenta mos proposta kooperasaun teknika ida ba Sr. Bastonário OAP iha area téknika, kapasitasaun nomos troka informasaun entre CGDA ho OAP. Proposta ne’e hetan apresiasaun diak tebes husi Sr. Bastonário ne’ebé hatudu kedas ho konvite ba Presidente CGDA atu vizita edifisiu OAP nian iha loron tuir mai durante estadia iha Portugal.

Tuir Sr. Bastonário, kooperasaun ida ne’e importante tebes ba nasaun 2, entre Portugal ho Timor Leste. Ho kooperasaun ne’e bele fasil liu ba Ordem atu kontrola advogados sira wainhira hala’o sira nia funsaun, tantu iha Portugal nomos iha Timor Leste rasik. Aleinde ne’e, bele fasilita diak liu tan CGDA ba foti desizaun ba aplikasaun husi advogados estranjeiros sira, liu-liu husi Portugal.

Sr. Ministro Dionísio hatan positivu tebes ba proposta ne’ebé aprezenta no diskuti. Tamba ho nune’e, bele sai hanesan dalan ida ba dezenvolvimentu rekursu humanos (advogados). Tamba Timor Leste mos deside ona utiliza lian Portuges hanesan lian ofisial, ho nune’e sei afeita mos ba servisu justisa nian. Aproveita ida ne’e, advogados Timor Leste nian mos sei utiliza lian Portuges iha nia servisu lorloron. Esperansa katak, advogados sira sei hetan benefisiu diak ba proposta ne’e iha futuru mai.

@Ilda-GMdJ