SEKRETÁRIU Estadu das Terras e Propriedade (SETP) iha loron 7 fulan-Maiu, 2013 foin lalais ne’e hala’o sosializasaun lei rai No. 1/2003 ba komunidade sira iha suku Lisafat, Sub Distritu Hatolia Distritu Ermera hodi husu ba komunidade sira atu labele hadau malu baliza.

Iha biban ne’e hanesan SETP Jaime Xavier Lopes husu ba komunidade sira atu labele hamosu problema hodi oho-malu tanba deit baliza, ne’ebé dalaruma liu-malu setimu 50.

“Ha’u husu ba komunidade sira tomak iha suku ida ne’e nian atu labele halo problema tanba deit baliza, dalaruma iha baliza liu-malu sentimetru 50 deit mós mosu ona problema, tuir lolós buat ne’e ita bele rezolve ho ulun malirin, ita la presiza hasai ema seluk nia vida tanba deit problema ne’ebé bele rezolve,” Tenik Jaime.

Tuir SETP volume problema kona-ba rai ka rai ne’ebé disputa iha teritóriu Timór-Leste iha distritu Ermera kategoria ba numéru daruak depois de Distritu Dili, tanba ne’e komesa iha tinan 2013 ne’e ba futuru SETP husu ba komunidade sira hodi bele hamenus problema ne’ebé maka iha.

Iha sosializasaun lei rai nian ne’ebé hala’o durante oras 5 nia laran iha suku Lisafat ne’e hetan antosiazmu makás hosi komunidade sira no mós lider komunitáriu sira, tanba tuir komunidade sira ne’e hanesan grasa boot ida ba komunidade sira iha suku refere, tanba durante ukun-án to’o agora SETP hanesan ema dahuluk ne’ebé hakbesik aan ba komunidade sira iha sira nia fatin.

Iha fatin hanesan Xefe Suku Lisafat informa ba SETP katak, problema ne’ebé durante ne’e komunidade sira infrenta maka, aman ho oan hadau malu baliza, oan hakiak, ho oan rais hadau malu baliza, nune’e mós inan- ho oan hadau malu baliza, hosi problema sira ne’e hotu dalaruma halo sira bele hamosu krime, hanesan aman ho oan oho malu tanba baliza.

Iha fatin hanesan komunidade sira hato’o mós sira nia duvidas ba iha SETP katak, rai ne’ebé hanesan rai eransa no rai ne’ebé rai lisan se maka iha direitu liu, oan sira ka estadu maka iha direitu.

Hatan ba duvidas komunidade nian sira ne’e SETP hanesan bainhira mosu problema hanesan ne’e tenki buka atu tuur hamutuk ho lider komunitáriu sira liu-liu lia nain sira ne’ebé iha koinesementu kona-ba rai refere. Maibe, kona-ba rai eransa konofrme ema ne’ebé atu entrega rai ne’e ba iha oan ka jerasaun ida ne’ebé, nune’e mós banihira akontese problema rai lisan, ne’e sei la partensia ba ema ida deit, tanba rai ne’e sei partensia ba lisan ne’e nian.

Partisipante ne’ebé partisipa iha sosializasaun lei rai nian ne’e maka Sekretáriu Estadu Terras Propriedade, Xefe Gabinete SETP, Diretora Interina DNTPSC nian, Diretór DTPSC Distritu Ermera, Administradór Sub Distritu Hatolia, Xefe Suku no Xefe Aldeia, Xefe Departementu Kadastro Nasional, Xefe Departementu Kartografia, Xefe Departementu Disputa ba Rai, inklui mós funsionáriu no Tékniku DNTPSC nian*