SEKRTETÁRIU Estadu Terras no Propriedade (SETP) iha loron Segunda, 14 fulan-Janeiru 2013 hala’o lansamentu kona-ba levantamentu dadus Kadastris nian iha Sub Distritu Suai Loro Distritu Covalima.

Iha lansamentu ne’e SETP kria mós enkontru komunitária ho komunidade sira, liu-liu komunidade sira ne’ebé maka durante ne’e hein hela ekipa tékniku sira atu ba sukat sira nia rai.

Iha enkontru komunitaria ba levantamentu dadus kadastrais nian ne’e SETP hateten, enkontru komunitária ne’e importante tebes ba komunidade sira atu partisipa, tanba presiza komuidade sira atu hatene liu kona-ba oinsa prosesu levantamentu dadus iha komunidade sira nia leet.

“Hanesan Sekretáriu Estadu ha’u husu ba komuidade sira inklui mós lider komunitária sira tenki fó sira nia kontribuisaun ba iha ekipa tekniku sira ne’ebé maka iha tempu badak sei mai sukat imi nia rai, bainhira la iha apoiu hosi komunidade sira entaun programa labele la’o ho di’ak, ohin ami mai iha ne’e tanba programa governu nian atu halo levantamentu dadus ba rai, liu-liu ba komuidade sira ne’ebé maka hela iha rai nia leten, ” tenik Jaime.

Oinsa maka hanoin rai iha TL bele sukat hotu, oinsa komunidade sira bele fó dadus ne’ebé loos no labele bosok, nune’e labele mosu problema entre komunidade sira.

“Uluk iha tempu koloniál portuges ema ne’ebé iha dokumentus rai hamutuk iha 5000 no iha tempu okupasaun Indonesia iha 55.500 e agora buka atu identifika hotu, ukun aan tenki ukun buat ne’ebé ita nian rasik, la’ós ita atu ba ukun fali ema seluk nia sasan ne’ebé la’ós ita-nian,” Jaime hateten.

Sekretáriu estadu ne’e husu ba komunidade sira tenki hanoin oan sira nia futuru, la kleur Suai Supply Base sei mosu iha suai, nune’e husu ba komunidade sira atu bele fó sira nia partisipasaun másimu ba programa ne’e, nia sujere mós ba komunidade sira hodi labele atu fa’an rai arbiru maibé buka meius oinsa hodi bele halo deit kontratu arrendmentu ho ema ne’ebé presiza rai, tanba fa’an rai sei fa’an mós oan sira nia futuru.

Rai ne’ebé sukat, sei sukat komunidade sira nia toos no natar, husu ba lia-nain sira atu bele hamulak halo didiak, hodi buat hotu bele lao tuir idaidak nia dalan.
Bainhira ekipa tkniku sira tuun ba sukat rai, komunidade sira tenki fó sira nia dadus no tenki hatudu baliza halo lolós ba malu atu labele mosu problema entre viziñu, bainhira sobu malu hanesan sobu familia.

iha fatin hanesan Xefe Suku Suai Loro husu ba komunidade sira atu bele fó sira nia partisipasaun masimu ba programa ne’ebé maka ekipa tékniku sira sei sei ba iha komunidade sira nia leet hodi sukat komunidade sira nia rai, nune’e husus ba komuidade sira no inan-aman sira tenki partisipa didiak iha seremonia ne’e.

iha fatin hanesan Komandante Eskuadra Sub Distritu Suai Loro mós husu ba komuidade sira bainhira iha problema ruma kona-ba baliza tenki buka meius oisa atu bele rezolve ho ulun malirin hodi labele mosu dezentendementu ruma, bainhira mosu krime ruma ne’e polisia maka sei rezolve tuir lei ne’ebé maka vigora ona iha nasaun ne’e.*