DNTPSC hala’o Formasaun Durante Loron 10

Atu Kapasita Funsionáriu kona-ba halo mapa

DIRESAUN Nasionál Terras Propriedade no Servisu Kadastrais iha loron kuarta 5 fulan-Dezembru, 2012 loin lalais ne’e fó formasaun kona-ba kadastru no toponomika ba funsionáriu nain 15 ne’ebé durante ne’e hala’o sira nia knár iha diresaun durante loron 10 nia laran.

Formasaun ne’e tuir Diretór DNTPSC, Romão Guterres katak, aban-bainrua bele hakerek naran iha mapa ho loloos, tanba durante ne’e funsionáriu sira iha duni ona koinesementu kona-ba hakerek naran iha mapa, maibé tékniku liu dalaruma sira ladun domina.

Iha formasaun ne’ebé ho hetan finanséiru hosi DNTPSC ne’e Romão husu ba funsionáriu sira atu tuir formasaun ne’e ho diadi’ak, tanba formasaun ne’e importante ba funsionáriu sira atu hatene, nune’e mós timoroan ne’ebé iha koinesementu konaba toponomika ne’e limitadu.

Romão esplika mós, atu hakerek naran iha mapa rai nian tenki tuir regra internasionál, tanba ne’e presiza tebes formasaun no kapasitasaun ba funsionáriu DNTPSC nian rasik.

Iha formasaun ne’ebé hahuu iha loron, 5 to’o loron 18 fulan-Dezembru 2012 ne’e Xefi Departementu Administrasaun Finansas DNTPSC, Paulino da Cruz hateten fomasaun ne’e importante ba partisipante sira atu tuir tanba formasaun ne’e bele aumenta partisipante sira nia kapasidade hodi naran iha mapa ho loloos.

Formasaun ne’e tuir Formadór Jose Ximenes Saramento Fernandes ho Fransica Tomas Gliola hosi kompaña HALATA ne’e sei haree-liu ba teoria toponomika, oinsa atu hakerek naran geografia liu-liu iha mapa rai nian.*

Ananias Babo Horta

Media no Dokumentasaun SETP