DILI,MJ-Quarta-feira 26 Fevereiru 2025 S. E. Vise-Ministru Fortalesimentu Institusionál, Partisipa no halo Abertura ba Primeira Konferênsia ho Tema; Crimes Praticados no Exercício de Funções Públicas Pelos Funcionários de Administração Pública,"Crimes de Corrupção Passiva Para Ato Lícito, Crimes de Peculato, Crimes do Abuso de Poder e Crimes de Participação Económica em Negócio", iha sala Auditoria, Ministériu Justisa, Bairru Liceu, Díli.

Primeira Konferênsia ne’e rasik, nu’udar Planu Atividade ne’ebe planeia husi Gabinete Vise-Ministru Fortalesimentu Institusionál ba tinan 2025, no Konferênsia sira tuir mai, ho tématika no Oradores sira ne’ebe sei-la hanesan.
Durante iha diskursu abertura, S. E. Vise-Ministru Fortalesimentu Institusionál, louva no agradese ba Dra. Angelina Joanina Saldanha-Adjunta Prokurador-Jeral da Repúblika-APGR no Dr. Rosário Salsinha Araujo-Komissáriu Adjuntu Prevensaun no Sensibilizasaun-CAC, hodi aseita sai nu’udar Orador iha Konferênsia refere.

Iha biban hanesan, S. E. Vise-Ministru Fortalesimentu Institusionál husu ba partisipantes sira atu aproveita di-diak Konferênsia ida ne’e, ho tema ne’ebe pertinente no atualizadu, ohin loron ita hotu iha priviléjiu hodi rona ita nia oradores na’in rua ne’ebe iha koñesimentu dia’k ba tema refere, ligadu ba krime sira ne’ebe pratikadu iha ita nia funsaun sira nu’udar Funsionáriu Púliku iha Administrasaun Públika ka Entidade Públika sira Timor-Leste nian, ligadu ba asuntu ne’e, hodi evita krime sira; Krime Korrupsaun Passiva ba Hahalok Lísitu, Krime Pekulatu, Krime Abusu Poder no Krime Partisipasaun Ekonómika iha Negósiu.
Atu evita tentativa sira Korrupsaun nian, laos deit, tenke halo leis barak ka hahalok sira ne’e mosu, tanba deit saláriu Funsionáriu sira nian ki’ik, maibe, hirak ne’e hotu depende moos ba konsiénsia Umana no dever moral ema ida-idak nian, ita bele kria leis barak, maibe la-iha dever moral atu kumpri no la atua funsaun sira ho responsabilidade no étika, lei sira ne’ebe iha, atu penaliza no kriminaliza deit, maibe konsiénsia ema nian maka sei determina ema nia komportamentu no ida-idak nia mentalidade.

Partisipantes iha Konferênsia refere, mai husi, Kargu Xéfia no Funsionáriu Sira Âmbitu Ministériu Justisa (Inklui Diretores no Funsionáriu Servisus Munisipais), no moos liñas Ministeriais ka Entidades sira seluk maka hanesan;Ministériu Finansas, (Imigrasaun), Ministériu Transporte no Telekomunikasaun (DNTT), Ministériu Ensinu Superior, Siénsia no Kultura, Sekretaria Estadu Formasaun Profissional no Empregu, Eletrisidade Timor-Leste-EDTL. EP, Servisu Rejistu no Verifikasaun Empresarial-SERVE. IP no moos Señor Sekretáriu Rejional Terras no Propriedades, Rejistu no Notariadu Rejiaun Administrativa Espesial Oe-Cusse Ambeno-RAEOA, hamutuk moos ho Funsionáriu sira RAEOA nian.