Dili-PN, 28/3/2023, Sua Exselensia Vise Ministru Justisa Dr. Jose Edmundo Caetano (Saka Timor) Aprezenta Projetu Lei no. 18/v(3a) konaba Primeiru Alterasaun ba Kodegu Prosesu Penal, Tersa-feira ne’e iha uma fukun Parlamentu Nasional.
Plenaria ba projetu lei ba alterasaun kodegu prosesu penal ne’e, parte setor justisa reprezenta husi governante vise ministru justisa no akompanha husi secretariu estadu terras no propriedades sr. Eldino Rodrigues do Santos no Director Nasional Asesoria Juridiku no Legislasaun Dr. Nelino Vital ho tekniku superior husi Ministeriu Justisa.

Iha plenaria votasaun final global ba projetu lei no. 18/v/(3a) ne’e, meja diriji husi Vise 1 Prezidenti Parlamentu Nasional, Deputada Maria Angelina Lopes Sarmento, ho membru hamutuk 43 deputadus. Liu husi biban ne’e, Vise Ministru Justisa Dr. Jose Edmundo Caetano apresia tebes ba inisiativa husi komisaun A Parlamentu Nasional ne’ebe diriji husi deputadu Joaquin dos Santos Borluli nudar prezidenti komisaun A hamutuk ho membru komisaun ne’ebe esforsu tebes ba projetu lei alterasaun ba kodegu prosesu penal to’o final.

Projetu lei refere durante tinan 2 nia laran iha meza komisaun A parlamentu nasional hodi halo diskusaun no konsege finaliza iha dia 28 de marsu de 2023 nebe hetan votasaun global final iha parlamentu nasional. Projetu lei ne’e, aprova ho votus afavor 43 contra 0 no abstensaun 0 signifika projetu lei no. 18/v(3a) konaba primeira alterasaun ba kodegu prosesu penal passa iha Parlamentu Nasional.

Maske deputadu sira balun iha kritiku ba projetu lei refere maibe ho intensaun konstrutivu atu hadiak setor justisa iha rai laran. Objetivu aterasaun kodegu prosesu penal ne’e tamba artigu balun ladun necesariu iha implementasaun sira, no aumenta artigu balun nebe kompara ho kondisaun rai laran.