OHIN VIII GOVERNU KONSTITUSIONAL OFISIALMENTE INAGURA ONA PORTU BAÍA TIBAR

Imajen Portu Baía Tibar, Liquica Kuarta (30 /11).

Dili, MJ: Kuarta-feira (30/11) ne’e, Ministru Justisa, Dr. Tiago Amaral Sarmento partisipa iha seremonia inagurasaun Portu Baía Tibar husi Prezidente Repúblika Dr. Jose Ramos Horta ho Primeiru Ministru, Jenerál Taur Matak Ruak.

Serimónia inagurasaun Portu foun no modernu ne’e akontese iha ámbitu Komemorasaun Loron Proklamasaun Independénsia Repúblika Demokrátika Timor-Leste ba dala-47.

Prezidente Repúblika, Dr. Jose Ramos Horta koa fita (liman los) simbolikamente inagura ona Portu baía Tibar no Primeiru Ministru, Jeneral Taur Matan Ruak asina Plaka Inagurasaun Portu Baía Tibar (foto liman karuk), Tibar, Kuarta (30/11).

Ho inagurasaun ne’e, Portu Baía Tibar sei troka Portu Díli hodi fasilita movimentu importasaun no esportasaun sasán ho kapasidade karga kontentór hamutuk millaun ida kada tinan. Portu ne’e inklui ka’is ida ho bersus rua ne’ebé sei uza hodi redus atrazu iha libertasaun kontentór inklui kustu tranzasaun atu fasilita efisiénsia servisu alfandegáriu no atividade komérsiu.

Efisiénsia ne’e konsidera hanesan pasu importante ida ba Ministériu Finansas iha ámbitu Reforma Fiskál no Jestaun Finansas Públikas, ajenda Reforma importante ida ne’ebé mak inísia ona desde tinan 2015 no Oitavu Governu Konstitusionál lideradu husi Primeiru-Ministru, Jenerál Taur Matak Ruak komprometidu atu kontinua implementa.

Imajen Portu Baía Tibar, Liquica Kuarta (30 /11).

Efisiénsia hirak ne’e mós sei ajuda Governu liuhusi Ministériu Finansas atu kolekta reseitas ho maneira ida ne’ebé justu, lais no transparente hodia ajuda redus país ninia dependénsia ba Fundu Minarai.

”Hahú ohin ba oin, parte rua sei halo jestaun ba portu ne’e rasik, ne’ebé ekipa jestaun hosi Governu kompete ba administrasaun Alfándega no portuáriu hodi kontinua nafatin servisu hanesan baibain hanesan uluk iha Portu Dili,” hateten,Vise-Ministru Finansa, António Freitas iha biban inagurasaun.

“Governu no empreza tau hamutuk osan ba konstrusaun Portu Tibar. Ita fó konfiansa ba emprezáriu la’ós ba halo jestaun de’it maibé mobiliza ema atu lori kontentór tama iha Timor-Leste no ita-nia portu bele sai fatin tránzitu ba Austrália no pasífiku, ne’ebé ita hakarak mak jestaun modernu no fó benefísiu ba joven sira atu aprende sistema sira,” nia tenik.

Prezidente Repúblika, Dr. Jose Ramos Horta, Prezidente Parlamentu Nasionál, Aniceto Guterres ho Primeiru Ministru, Jeneral Taur Matan Ruak akompanadu husi membru Governu hotu inklui Dr. Mari Alkatiri iha inagurasaun Portu Baía Tibar, Liquica, Kuarta (30/11).

Portu Tibar ida-ne’e progresu boot ba Timor-Leste. Ha’u fiar katak ba oin liuhosi buat sira ne’e, dezenvolvimentu ekonomia sei la’o tanba portu ne’e rasik ho nia fasilidade kompletu hodi bele ajuda setór privadu sira iha nasaun ne’e,” PR Horta hateten iha portu Tibar, kuarta (30/11) ne’e.

Portu foun no modernu ne’e sei fasilita Timor-Leste ninia konektividade marítima iha rejiaun Ázia, liga Timor-Leste ba merkadu komérsiu globál no hasa’e liután país ninia asesu komérsiu ba merkadória sira hanesan agrikultura, turizmu, peskas, pekuária nomós indústria sira seluk – dalan ida atu ajuda Timor-Leste diversifika ninia produsaun.

Konstrusaun Portu Baía Tibar ho modalidade Parseria Públiku-Privada (PPP, sigla Ingles) entre Governu Timor-Leste ne’ebé aloka millaun $130 iha Fundu Viabilidade (VGF, sigla Inglés) no Timor Port, subsidiáriu husi Bolloré ho millaun $150, hamutuk millaun $280 ba faze inísiu husi totál investimentu estimativu millaun $500 ba tinan 30.

30 Novembru 2022
#Media_Gabinete_MJ