Primeiru Ministru, Jeneral Taur Matan Ruak Lidera Sorumutuk Konsellu Ministru semana dahat fulan Outubru nian, iha Palásiu Governu – Dili, Kuarta (26/10).

Dili, MJ: Iha Kuarta-feira (26/10) ne’e, Ministru Justisa Dr. Tiago Amaral Sarmento partisipa iha Sorumutuk Konsellu Ministrus Ordináriu, semana dahat fulan Outubru nian iha Palásiu Governu, Dili.
Iha Sorumutuk Konsellu Ministrus aprova ona Proposta Rezolusaun Parlamentu Nasionál rua, ne’ebé aprezenta husi Ministra Negósiu Estranjeiru no Kooperasaun, Adaljiza Albertina Xavier Reis Magno, ba aprovasaun Akordu kona-ba Servisu Aéreu sira nian entre Repúblika Demokrátika Timor-Leste no Repúblika Indonézia no Repúblika Singapura.

Akordu hirak ne’e iha objetivu prinsipál atu garante realizasaun voo komersiál regulár entre Timor-Leste no Indonézia no Singapura, ho hanoin atu promove dezenvolvimentu iha setór ekonómiku, komersiál no turizmu país hirak ne’e nian.
KM aprova ona mós projetu Rezolusaun Governu, ne’ebé aprezenta husi Ministru Koordenadór Asuntu Ekonómiku, Joaquim Amarál, ne’ebé aprova Polítika no Estratéjia ba Setór Privadu.
Ho intervensaun lejislativa ida-ne’e ho ninia objetivu atu atinji espansaun setór privadu, nu’udar motor prinsipál ba kreximentu ekonómiku no atu hamenus dezempregu, liuhusi hadi’a ambiente negósiu, diversifikasaun baze ekonómika nasionál no promosaun inkluzaun sosiál no ekonómika.
Prevee kriasaun Konsellu Dezenvolvimentu Emprezariál ida, ne’ebé inklui entidade governamentál relevante oin-oin ba matéria ne’e, ne’ebé sei sai responsavel ba kriasaun no expansaun empreza sira, programa formasaun nian no sentru sira dezenvolvimentu emprezariál nian. Konsellu ida-ne’e ninia misaun mós atu dezenvolve programa espesiál sira atu promove revitalizasaun ba Empreza Ki’ik no Média nasionál sira.

Ministru Justisa Dr. Tiago Amaral sarmento iha Sorumutuk Konsellu Ministru semana dahat fulan Outubru nian, iha Palásiu Governu – Dili, Kuarta (26/10).

Koordenasaun no implementasaun polítika ida-ne’e sei responsabiliza husi membru Governu ne’ebé responsavel ba área koordenasaun asuntu ekonómiku, ne’ebé iha kolaborasaun ho membru Governu sira-seluk ne’ebé responsavel ba área relevante ba dezenvolvimentu iha setór privadu.

Konsellu Ministrus, tuir projetu ne’ebé aprezenta husi Ministru Obras Públika, Abel Pires da silva, delibera atu autoriza prosedimentu Aprovizionamentu ba obras públika ne’ebé relasiona ho projetu konstrusaun Manleuana River Training Works no Rede Drenajem D04, iha Kaikoli, ho valór intestimentu ida ho totál hamutuk dolar amerikanu millaun 15,6.

Konsellu Ministrus delibera mós atu autoriza atu hala’o despeza bazeia ba kontratu depózitu selebradu ida ho Banku Nasionál Komérsiu Timor-Leste ba implementasaun Liña Kréditu “Fasilidade Garantia Kréditu Suave” no ho transferénsia dolar amerikanu millaun limanulu husi konta tezouru ba konta bankária ne’ebé loke bazeia ba kontratu ne’e. Projetu deliberasaun ne’e aprezenta husi Ministru Turizmu, Komérsiu no Indústria, José Lucas do Carmo da Silva.

Liña Kréditu “Fasilidade Garantia Kréditu Suave” ho objetivu atu estabelese garantia kréditu ida kona-ba kréditu ne’ebé sei fó husi instituisaun bankária ba empreza mikru, ki’ik, média no boot, ho objetivu ba fixasaun ba Taxa juru remuneratória ne’ebé permite hadi’a kondisaun asesu ba kréditu husi parte empreza ne’ebé opera iha merkadu nasionál.
Liña kréditu ida-ne’e finansia husi dotasaun dolar amerikanu millaun limanulu, inskrita ona iha Orsamentu Jerál Estadu ba tinan 2022 nian.

26 Outubru 2022
#Media_Gabinete_MJ