Ekipa Servisu Kadastrus Nasionál ho husi RAEOA nian halo hela levantamentu ba uma Komunidade ne'ebé sei hetan ka sei simu uluk “Sertifikadu Titlu Nain ba Rai” iha RAEOA, Kinta (29/09).

RAEOA, MJ: Kinta-feira (29/09) meudia ne’e, Ministru Justisa Dr. Tiago Amaral Sarmento, Sekretraiu Estadu Terras e Propriedades (SETP) Eldino Rodrigue dos Santos, ho komitiva dezloka ba Rejiaun Espesial Oecusse-Ambeno RAEOA hodi hasoru malun ho Sekretariu Rejional Asuntu Terras e Propriedades Rejiaun Espesial Oecusse-Ambeno, Antonio Hermenegildo da Costa, lider komunitaria no Komunidade sira.

Iha reuniaun Ministru Justisa koalia kona-ba preparasaun ba atribuisaun “Sertifikadu Titlu Nain ba Rai” tuir planu Ministériu Justisa nian, sei hahu iha RAEOA, nune’e Ministru Justisa mai ho ekipa teknika kadastrus sira hodi hahu halo levantamentu kadastrus ba terrenu komunidade hirak ne’ebé sei simu uluk “sertifikadu Titlu Nain ba Rai” iha iha RAEOA hanesan komunidade benefisiariu Uma Kbiit Laek (UKL) no veteranu 24 anos ne’ebé simu ona uma husi estadu.

Hafoin reuniaun ho Sekretariu Rejional, lider komunitaria no Komunidade sira, Ministru Justisa ho komitiva dezloka kedas ba Suku Lifau, Naimeco ho Suku Cunha hodi hare no halo levantamentu ba Uma UKL hirak ne’ebé tuir planu Terras e Propriedades sei halo levantamentu dadus ba komunidade no uma Kbiit laek hirak ne’ebé sei simu uluk "sertifikadu Titlu Nain ba Rai", iha Selebrasaun Loron Proklamasaun Independensia 28 Novembru mai.

Ministru Justisa Dr. Tiago Amaral Sarmento ho Sekretraiu Estadu Terras e Propriedades (SETP) Eldino Rodrigue dos Santos foto hamutuk Sekretariu Rejional Asuntu Terras e Propriedades Rejiaun Espesial Oecusse-Ambeno, Antonio Hermenegildo da Costa, parte seguransa, lider komunitaria no Komunidade sira, RAEOA, Kinta (29/09).

Aleinde atribui sertifikadu Titlu Nain ba Rai ba Sidadaun sira iha Oe-cusse Governu mós sei atribui "sertifikadu Titlu Nain ba Rai" ba benefisariu UKL no ba uma Veteranu sira iha Munisípiu 13 seluk inklui munisípiu foun Atauro.

29 Setembru 2022
#Media_Gabinete_MJ