Ministru Justisa Dr. Tiago Amaral Sarmento ho Enkaregadu Negosiu Embaixada EUA, Sr. Tom Daley asina kontratu arrendamnetu ba rai no Propriedades entre Governu Timor-Leste ho Estadus Unidus Amerika, MNEC Pantai Kelapa, Dili-Timor-Leste, Sexta (12/08).

Dili, MJ: Sexta-feira (12/08) dader ne'e, Ministru Justisa Dr. Tiago Amaral Sarmento reprezenta Governu Timor-Leste Asina ona Kontratu Resiprosidade (Land and property swap) entre Governu Timor-Leste ho Estadus Unidus Amerika (USA) ne'ebé reprezenta husi Enkaregadu Negosiu Embaixada EUA iha Timor-Leste Sr. Tom Daley.
Akordu arrendamentu hirak ne’e asina mós iha Nova Iorke husi Embaixadór Timor-Leste ba Estadus Unidus Amerika Isilio Coelho no Timor-Leste nia reprezentante ba ONU, Embaixadór Karlito Nunes.
Liuhusi asina Kontratu Resiprosidade hirak ne’e, Governu Timor-Leste no Governu Estadus Unidus Amérika konkorda ona hodi arrenda propriedade ba instalasaun Embaixada nasaun rua nian hodi hametin liután engajamentu diplomátiku.
Kontratu resiprosidade ba Rai ho Propriedades refere husi Parte USA sei utiliza Terrenu ne'ebé iha Pantai Kelapa Dili ho durasaun tinan 50, no automatikamente sei renova no hanaruk tan ba tinan 50. Husi parte Timor-Leste mós sei utiliza Rai no Propriedades iha Washington DC no Iha Nova Iorke, Estadus Unidus Amerika ho kondisoens ne’ebé hanesan.
Asinatura akordu ba resiprosidade entre nasaun rua ne’e hanesan Marka istoria foun ida entre Governu Timor-Leste ho Estadus Unidus Amerika Timor-Leste no sei kontinua ho Embaixada sira seluk iha Timor-Leste.

Ministru Justisa Dr. Tiago Amaral Sarmento ho Enkaregadu Negosiu Embaixada EUA, Sr. Tom Daley asina kontratu arrendamnetu ba rai no Propriedades entre Governu Timor-Leste ho Estadus Unidus Amerika, MNEC Pantai Kelapa, Dili-Timor-Leste, Sexta (12/08).

”Kontratu ida ne’e mak ba dala uluk halo entre Repúblika Demokrátika Timor-Leste ho Estadus Unidus Amerika, no hein katak, iha tempu oin mai sei halo tan ho nasaun sira seluk. Liu husi sira nia Embaixada iha Dili. Akordu ida ne’e sei hametin liu tan laxu amizade entre rai rua nomós sei hametin liu kooperasaun entre nasaun rua ho base ba prinsipiu iguldade no fahe hanesan. Ho kontratu ida ne’e, iha esperansa boot katak ita nia misaun diplomátika iha Washington no Nova Iorque sei diak liu tan nomós bele redus ona gasta estadu nian atu hodi selu renda iha rai rua refere,” sita Ministru Justisa iha diskursu.
”Asina kontratu arrendamentu ohin loron nian hanesan garantia ida importante tebes kona-ba ami-nia kompromisu ba tempo naruk ho Timor-Leste,” haktuir Enkaregadu Negósiu Estadus Unidus Tom Daley iha nia diskursu bainhira asina akordu arrendamentu iha Ministériu Negósiu Estranjeiru no Kooperasaun.

Liman karuk, Ministru Justisa Dr. Tiago Amaral Sarmento ho Enkaregadu Negosiu embaixada Estadus Unidus Amerika Tom Daley asina kontratu iha Timor-Leste no linam loos Embaixador TL ba EUA Unidus Amerika Isilio Coelho no Timor-Leste nia reprezentante ba ONU, Embaixadór Karlito, iha Nova Iorke, EUA, Sexta (12/08).

”Ikus liu, ida ne’e signifika katak ita bele promove ho di’ak liutan pilár fundamental hirak ne’ebe mak define relasaun bilaterál entre Estadus Unidus Amérika no Timor-Leste, hanesan: belun, parseiru no oportunidade sira. Asinatura ohin loron nian sei permite ita hodi dezenvolve bazeia bai ta-nia parseria demokrátika iha dékada hirak tuirmai hodi promove liután povu Timor-Leste no Amerikanu sira-nia interese”
”Sira (EUA) mós bele halo uma ho as to’o metrus 35 deit” informa Ministru Justisa ba media sira iha MNEC.
Bazeia ba nota verbal husi MNEC, konstrusaun hotu ne’ebé sei halo husi Estadus Unidus Amerika iha terrenu refere tenke konsidera rekomendasoens sira iha nota verbal no. 10/DGAV-DAC/VI/2016. Liuliu kona-ba rekomendasoen husi Autoridade Aviasaun Sivil Timor-Leste kona-ba konsidera ba planu ekspansaun ba konstrusaun Aeroportu Internasional Nicolau Lobatu, Comoro. Nune’e husu atu elavasaun ba konstrusaun edifisiu no antena iha kompleksu Embaixada EUA labele As liu metru 35 husi rai no tasi leten.”

Enkaregadu Negosiu Embaixada EUA, Sr. Tom Daley ho Ministru Justisa Dr. Tiago Amaral Sarmento foto ho dokumentus resiprosidade ne’ebe asina ona no akompandu husi Ministra Negosiu Estranjeirus no Kooperasaun (MNEC), Sra. Adalzija Magno ho Vise MNEC Julião da Silva.

1. Lokalizasaun ba kompleksu Embaixada EUA nian ne’e sai husi (fora husi) limitasaun peskiza ICAO “Grafiku A”. Maibe, ninia lokalizasaun ne’e iha superfisiu ba tranzisaun aerodrome nia okos. Ho nune’e, edifisius hirak ne’ebe besik, nune’e mós konstrusaun embaixada iha futuru tenki sujetu ba restrisoens ba elevasaun.
2. Konsidera planu ekspansaun ba Aeroporto Internasional Nicolau Lobato Comoro (diresaun lii iha mota Comoro) estudu hatudu katak elevasaun ba edifisiu foun no antennas ruma iha kompleksu embaixada nian labele aas liu metrus 35 asima tasi nia leten.

Seremonia asinatura ne'ebé hala'o iha Edifisiu MNEC Pantai Kelapa ne'e partisipa mós husi Ministra Negosiu Estranjeirus no Kooperasaun (MNEC), Sra. Adalzija Magno ho Vise MNEC Julião da Silva no Diretor Jeral Terras e Propriedades Lucas da Costa.

10 Agostu 2022
#Media_Gabinete_MJ