MINISTRU JUSTISA FÓ POSSE BA DEFENSORES PÚBLIKUS RESPONSAVES BA MUNISÍPIU BAUCAU NO RUA SELUK

Defensores Publiku sira foto hamutuk ho Ministru Justisa Dr. Tiago Amaral Sarmento,Prezidente Tribunal Rekursu Deolindo Dos Santos, Vise Ministru Justisa Dr. Jose E. Caetano no ho Sekretariu Estadu Terras e Propriedades Eldino Rodrigues dos Santos, adjuntu Diretor PCIC, prezidente Komisaun Rai no Propriedades no ho Diretora SFJJ, hafoin tomada de posse ba Defensores Púliku nain tolu SFJJ, Caicoli, Kinta (28/07).

Dili, MJ: Kinta-feira (28/07) loraik ne’e, Ministru Justisa Dr. Tiago Amaral Sarmento, akompañadu hosi Defensória Públika Jerál Cancio Xavier, fó posse ba Defensór Públiku nain tolu ne’ebé sei responsavel ba Defensoria Públika Munisípal Baucau, Covalima no Rejiaun Espesial Oecusse - Ambeno (RAEOA), ne’ebé hala’o iha Sentru Formasaun Jurídiku no Judisiáriu (SFJJ), Caicoli, Dili.
Ho nune’e, Ministru Justisa, Tiago Amaral Sarmento, hateten nomeasaun ba iha Defensória Públika ne’e importante atu bele responde ba atendimentu kazu sira iha munisípiu.

“Parabéns ba emposadu sira no husu atu halo kna’ar ho di’ak tuir lei haruka hodi fó asisténsia jurídika ba ita nia komunidade sira ne’ebé presiza justisa,” Ministru Justisa afirma iha intervensaun iha biban tomada de posse iha SFJJ Caicoli, Kinta-feira (28/07) ne’e.

VIII Governu Konstitusionál liuhosi Ministériu Justisa esforsu hodi kontinua investe iha área rekursu umanu liuliu atu haforsa serbisu Defesória Públika iha munisípiu sira nian tuir ezijénsia lei organizasaun judisiáriu.

Tuir mai lista Defensores Publikus nain tolu ne’ebé simu tomada de posse hodi subtitui Defensores nain tolu husi Munisípiu tolu mak hanesan ;

  1. Dra. Laura Valente Lay, ho karreira profissional nu'udar Defensora Públika II klase, eskalaun B, exerse funsaun hanesan Defensora Públika Responsável ha Defensoria Públika Munisípal Baucau, simu posse hodi subtitui Defensor Públiku, Dr. Gregório Maria Lourdes de Lima, ne'ebé termina ona nia mandatu, hafoin periodu rua tutuir malu exerse funsaun nu'udar Defensor Públiku Responsável iha Defensoria Públika Munisípal Baucau.
  2. Dr. Jonas Henrique da Costa, ho karreira profissional antes ne'e nu'udar Defensor Publiku II klase, eskalaun A. Simu posse nu'udar Defensor Públiku, Responsável ba Defensoria Públika Munisípal Covalima hodi subtitui Defensor Públiku, Dr. Manuel Amaral, ne'ebé termina ona nia mandatu hafoin periódu rua tutuir malu exerse funsaun hanesan Defensor Públiku Responsável iha Defensoria Públika Munisipal Covalima.
  3. Dr. Afonso Gomes Fátima, antes ne'e ho karreira profissional nu'udar Defensor Públiku II klase, eskalaun A, simu posse nu'udar Defensor Públiku Responsável ba Defensoria Públika RAEOA, hodi subtitui Defensor Públiku, Dr. Calisto Totu, ne'ebé termina ona nia mandatu, hafoin periodu rua tutuir malu exerse funsaun hanesan Defensor Públiku Responsável iha Defensoria Públika RAEOA.

Dra. Laura Valente Lay simu posse nu’udar Defensora Públika Responsável ba Defensoria Públika Munisípal Baucau, SFJJ, Caicoli, Kinta (28/07).

Antes ne'e iha fulan Maiu liuba, Konsellu Superior Defensoria Públika, exerse funsaun no uza atribuisoins ho responsabilidade, konferida tuir artigu 35" alinea a,c,d no e, artigu 38 numeru 4 no artigu 92 Dekretu-Lei No. 10/2017, Estatutu Defensoria Públika nian: Halo ona reuniaun ordinariamente ho prezensa membrus Konsellu Superior nian, halo apresiasaun, diskute no ikus mai aprova proposta Re-estruturasaun pozisaun ba Defensores Públikus Responsáveis Munisípius Baucau, Covalima no RAEOA, iha loron 12 fulan-Maiu tinan 2022.

Dr. Jonas Henrique da Costa, simu posse nu'udar Defensor Públiku, Responsável ba Defensoria Públika Munisípal Covalima, SFJJ Caicoli, Kinta (28/07).

Seremonia tomada de posse ne'e partisipa husi Prezidente Tribunal Rekursu, Dr. Deolindo dos Santos, Vise Ministru Justisa Jose E. Caetano, Prokurador-Jeral Repúblika, Dr. Alfonso Lopes, Komisariu Komisaun Anti Korrupsaun, Dr. Sergio Hornai, SETP Eldino Rodrigues dos Santos, Diretores sira ambitu Ministériu Justisa, Prezidente Komisaun Rai no Propriedades, Defensores sira, konvidadus e família husi emposadu sira.

Dr. Afonso Gomes Fátima, simu posse nu'udar Defensor Públiku Responsável ba Defensoria Públika RAEOA, hodi subtitui Defensor Públiku, Dr. Calisto Totu, SFJJ Caicoli, Kinta (28/07).

28 Jullu 2022
#Media_Gabinete_MJ