Ministru Justisa Dr. Tiago Amaral Sarmento kaer liman ho CEO Pertamina Internasional Timor SA, hafoin Diretor Jeral Terras e Propriedades, Rodrigo Mendonça entrega simbolikamente folha Kontratu ba CEO Pertamina Internasional iha Gabinete Ministru Justisa, Sexta-Feira (24/06).

Ministru Justisa : Valor kontratu arrendamentu $10.000 kada fulan no selu hahu fulan Marsu 2022


Dili, MJ: Ohin Ministériu Justisa marka tan istoria ida husi Servisu Terras e Propriedades nian, hafoin halo negosiasaun durante fulan hat, hahu kedas husi Ministru Justisa sesante, Dr. Manuel Cárceres da Costa e kontinua mai Ministru Justisa Dr. Tiago Amaral Sarmento.


No Sexta-Feira (24/06) semana ne'e, Ministrus Justisa Dr. Tiago Amaral Sarmento akompaña husi Diretor Jeral Terras e Propriedades, Rodrigo Mendonça no Diretor Jerál Administrasaun no Politika (DJAPJ) Salvador da Costa, Ministru Justisa ho CEO Pertamina Internasionál Timor Sa, Beny Harto Wijaya no reprezentante konsorsiu husi Timoroan, Adolfo Antonio Belo, asina ona kontratu arrendamentu ba rai no Propriedades estadu ne’ebé lokaliza iha Pantai-kelapa, Dili.


Iha selebrasaun kontratu arrendamentu ho durasaun tinan 30, ne'ebé hala’o iha Gabinete Ministériu Justisa refere, Pertamina Internasional Timor Sa, sei selu valor kontratu arrendamentu ho Dollar Amerikanu Rihun Sanulu ($ 10.000) kada fulan, hahu husi fulan Marsu 2022 ba oin, no sei kontinua tan kontratu tinan 30 tan.


“ Maske selebra ona kontratu arrendamentu, maibe iha mós klauza ka artigu Ida ne'ebé mensiona mós katak parte Pertamina Internasional Timor SA, durante kontratu tinan 30 ne'e, sira mós buka dadaun ka identifika dadaun ona terrenu, nune'e wainhira governu ka Estadu TL presiza terrenu refere ba intrese estadu ka Governu nian, sira (pertamina) mós prontu atu muda ka sai husi fatin Pantai-Kelapa", informa Ministru Justisa ba media sira hafoin asinatura kontratu, iha Gabinete Ministru Justisa, Rua Colmera, Dili.

Ministru Justisa Dr. Tiago Amaral Sarmento asina hela folha kontratu arrendamnetu Rai no Propriedades ne'ebé okupa hela husi Pertaminia Intrenasional Timor SA, iha Pantai-Kelapa ne’ebe konesidu ho naran Pertamina Indonesia, Sexta-Feira (24/06).

Parte Pertamina informa katak, sira sente kontente tanba bele selebra ona kontratu arrendamentu ka sewa tanah ho Ministériu Justisa, ne'e hanesan mós kontribuisaun Pertamina Indonesia ka PITSA ba dezenvolvimentu Timor-Leste, tanba pursentu 95 husi traballador sira iha Pertamina refere mesak Timoroan deit.

24 Junu 2022
#Media_Gabinete_MJ