MINISTRU JUSTISA REUNIAUN HO VISE MINISTRU FINANSAS DESKUTI OBSTAKLU DESENVOLVIMENTU TURIZMU CRISTO REI


Dili, MJ: Tersa-feira (14/06) semana ne'e, antes reuniaun Konsellu Konsultivu Ministériu Justisa, Ministru Justisa Dr. Tiago Amaral Sarmento, akompañadu husi Vise Ministru Justisa Dr. Jose Edmundo Caetano simu no reuniaun ho Vise Ministru Finansas António Freitas, ho komitiva iha knar fatin, Gabinete Ministru Justisa.


Reuniaun ne'ebé hala'o iha oras tuku 14:00 Otl ne'e, atu deskuti sobre Projeitus estratejikus husi VIII Governu Konstitusional ninian, ne'ebé ligadu ho konstrusaun Aeroportu Internasionál Nicolau Lobatu, Estrada Trosu Rotunda Nicolau Lobatu ba Tibar, no ida tan mak kona-ba projetu Parseria Publiku Privadu (PPP) Turizmu Cristo Rei liga ho estrada ligasaun Pasir-Putih ba Dolog Oan.


“ Projeitu Kristu Rei, ita hetan asistensia tekniku husi Governu Estadus Unidus Amerika (EUA) ne'ebé liuhusi USAID finaliza ona Pre-feasibility Study no iha faze feasibility Study. Bainbhira halo konsultasaun mak foin deskobre no indika katak rai balun iha parte Dolog oan ne'e pertense ba rai privadu Sr. Julio Nheu no ida ne'e sai hanesan obstaklu boot ida ba desenvolvimentu Turizmu Cristo Rei" informa Vise Ministru Finansas, Antonio Freitas.

No ida ne'e sai obstaklu ba projetu (PPP) Dezenvolvimentu Turizmu Cristo Rei, karik ida ne'e mak failla, sei fó impaktu mós ba tranzisaun Projetu Portu Dili ba portu turizmu.
Nune'e Vise Ministru espera ho diskusuan ne'e bele iha solusaun ba obstaklus ba Dezenvolvinentu Turismu Crizto Rei, Aero portu Internasional Nicolau Lobatu no Estrada Trosu husi Rotunda Nicolau Lobatu ba to'o Tasi-tolu.


Hafoin rona esplikasaun husi Vise Ministru Finansas, Ministru Justisa, Dr. Tiago Amaral Sarmento, husu ba Vise Ministru Finansa atu entrega hela problema ne'e ba Ministru Justisa no Diretores sira nu'udar Trabalho para Casa ida, no Ministru Justisa sei esforsu atu buka solusaun, buka serteza no verdade ba problemas rai ne'ebé sai obstaklus ba Dezenvolvimentus projetu turizmu Cristo Rei refere.

Partisipa mós iha Reuniaun refere Diretor Jeral Terras e Propriedades, Rodrigo Mendonça, Diretor Nasionál Terras e Propriedades Helder Cosme, Koordenador Working group ba Konstrusaun Aeroportu Internasional Nicolau Lobatu, Sr. José Abel no DG Finansas, Sr. Francisco.


Hafoin reuniaun ho Vise Ministru Finansas António Freitas ho komitiva, Ministru Justisa kontinua kedas ho reuniaun Konsellu Konsultivu Ministériu Justisa, iha Cafetaria Ministériu Justisa.


14 Junu 2022
#Media_Gabinete_MJ