Asuntu korupsaun iha Administrasaun Publiku neébé nakait ho ajente estranjeirus sira ba iha transaksaun komersiais internasional sai mos hanesan pontu importante ida husi rekomendasaun Semeira Ministro da Justiça CPLP iha Maputo, Mozambique, fulan Februari 2010 liu ba (rekomendasaun seluk maka kona ba Trafiku Umano). Asuntu rua neé, sei hetan diskusaun hodi hola desizaun iha Konferensia Ministro da Justiça CPLP nian, neébé tuir planu sei realiza iha Lisboa, Portugal fulan Novembru tinan ida neé.

Molok atu hakat ba konferensia Ministro sira nian neé, Sekretariadu CPLP konvida peritus husi nasaun membru CPLP sira atu halo diskusaun klean hodi hamosu rekomendasaun kona ba asuntu korupsaun iha Administrasaun Publiku neébé nakait ho ajente estranjeirus sira ba iha transaksaun komersiais internasional, neébé Timor-Leste mos partisipa ba. Reprezentante husi Timor-Leste nian iha sorumutu tekniku neé maka Sr. Nelinho Vital, Direitor DNAJL-Ministério da Justiça nomos Sr. Miguel Lemos, Assessor Ministro da Justiça.

Durante loron 2 halaó sorumutu iha Cidade da Praia neé, halo aprezentasaun no diskusaun kona ba terminolojia korupsaun iha administrasaun publiku neébé ligadu ho ajente internasional tuir regulamentu kada nasaun nian, regulamentu neébe estabelese ona hodi kombate korupsaun, estabelesimentu instituisaun estado nian ba prevensaun korupsaun inklui kooperasaun internasional neébé estabelesidu, nomos pontu importante seluk tan. Topiku ba diskusaun ne’e la ses husi konvensaun UNO nian ba luta kontra korupsaun ne’ebé konhesidu ho naran UNCAC.

Durante loron 2 sorumutu neé, konsege duni hamosu rekomendasaun importante balun, neébé sei entrega ba Ministro da Justiça kada nasaun membru CPLP nian, molok atu hakat ba konferensia iha fulan Novembru neé. Husi nasaun membru CPLP hirak neé, nasaun Brazil no Guine Bissau maka la hola parte tamba razaun voó nomos situasaun seguransa iha rai laran (kudeta iha Guine Bissau).

Reportajem-Nelinho Vital